خبر عام وتعليق هام.. «رفع الدعم ليس له علاقة برفع الأسعار!»
يقول الخبر: «أوضح مدير اتصالات ريف دمشق، أن نتيجة قطع الكهرباء فإن خدمة الأبراج تنخفض، وهذا يؤدي إلى تردٍّ في الخدمة».
التعليق: وهنا إن عرف السبب بَطُلَ العجب... الكهربا يا جماعة هية سبب كل المصايب... بس عدم المؤاخذة يوم يلي رفعتوا أجور المكالمات الخليوية والأرضي والإنترنت مو كان ع أساس كرمال يحصل المستخدم ع خدمة مستمرة وجودة عالية؟! يعني إذا انتو نسيتو فنحنا ما نسينا.. كلو مسجل!
يقول الخبر: «كشف مدير عام السورية للتجارة زياد هزاع أنه سيتم قريباً إدراج الدخان الوطني على البطاقة الذكية، وبيعه بالسعر النظامي للمواطن».
التعليق: يعني باكيت كل تلت شهور للمواطن مثلاً؟ وممكن ما توصلوا الرسالة وتروح عليه مخصصاتو! طيب كملوا معروفكن مع هل المواطن وخصصولو كل يوم سيجارة منشان صحتو وعافيتو يلي رح تنقصف من وراكن مو بسبب الدخان...
يقول الخبر: «أعلن وزير التجارة الداخلية وحماية المستهلك، عبر منشور على صفحته الرسمية في موقع فيسبوك، عن البدء بضخ كميات جيدة من زيت دوار الشمس في الأسواق اعتباراً من تاريخ 5/ آذار، وأشار أنه هناك كميات جيدة في الأسواق وستبدأ الأسعار بالانخفاض تدريجيّاً خلال الأسبوع الحالي والقادم».
التعليق: سبحان الله انخفاض الأسعار يلي بتحكوا عنو (إن صار) فـحالة نادرة واستثنائية وبطيئة.. أما ارتفاع الأسعار فـبقفزة نوعية بتحلق عالياً... ولهيك بتنزل اليوم ع الأسواق لتدور فيها ع زيت دوار الشمس بيفتل مخك لتلاقي، وفي حال حالفك الحظ ولقيت بتلاقي اللتر بيوصل سعره لـ 15000 ل. س إي شو هل التناقض هاد يااااا!!!
يقول الخبر: «قال مدير الأسعار في وزارة التجارة الداخلية وحماية المستهلك، لصحيفة تشرين المحلية، إن القرار الأخير الذي أصدرته الحكومة برفع الدعم عن مجموعات كبيرة من العائلات في سورية ليس له علاقة برفع الأسعار على هذا النحو السريع حالياً، وألقى اللوم على التجار، حيث قال: سبب هذا الارتفاع هو محاولات لبعض ضعاف النفوس وبعض التجار استغلال قرار رفع الدعم، أما بالنسبة لارتفاع أسعار بعض الخضروات، فسببه الظروف المناخية في فصل الشتاء من كل سنة».
التعليق: هلأ الشتاء والظروف المناخية جسمها لبيس وبتتحمل جزءاً من المسؤولية.. بس معقول تخفيض الدعم مالو علاقة برفع الأسعار.. يعني فعلاً هون ممكن ينطبق الحكي تبع تعلم كيف تتهرب من المسؤولية وإلقاء اللوم على الآخرين في ثلاثة أيام من دون معلم...
يقول الخبر: «تشهد البلاد منخفضاً جوياً ورياح قوية، بدوره، أوضح مدير كهرباء طرطوس أنه تم فصل مخارج كهربائية عدة، تحسباً لحدوث أعطال كهربائية نتيجة العاصفة التي تشهدها المحافظة».
التعليق: لك والله كان لازم من زمان هيك تعملوا... هيك هيك سورية كلها ما فيها كهربا.. بالشتي لأنو برد.. وبالصيف لأنو شوب.. والفصلين الباقيين ع البيعة... بس المصيبة إنو دائماً في فواتير.. منين وكيف ما حدا بيعرف!
معلومات إضافية
- العدد رقم:
- 1060
