خبر عام وتعليق هام! تسهيل إجراءات دخول الوافدين إلى الأراضي السورية!

تعليق: لك حبيباتي اللي بدو يعمل منيحة يكملها... يعني شو بيصير لو تاخدو قرار مؤقت بتعليق صرف الـ100 دولار ع كل سوري بدو يدخل ع بلدو من لبنان بهالظروف... هيك بتكونو سهلتو الإجراءات بشكل كبير... يعني ما بيكفي إنو القرار بذاتو مو صحيح وغير قانوني... طب حد أدنى عملو هالاستثناء حالياً... ولا صعبة عليكم...!!

يقول الخبر: كشف مدير مالية دمشق أن نسبة غير الملزمين بالربط الإلكتروني نهائياً في قسم كبار المكلفين، ولم يربطوا مع الدوائر المالية سجلت 32٪، مقابل 27٪ ألزموا بالربط ولكنهم لم يرحلوا فواتير، أما الملتزمون بالربط ويرحلون فواتيرهم بشكل دائم إلى الدوائر المالية فلم تتجاوز نسبتهم 41٪، لافتاً إلى أنه يجري حالياً التأكد من الأرقام المرحّلة من خلال الزيارات الميدانية.
تعليق: يعني بعد كل التهليل الرسمي عن الربط الإلكتروني والمتابعات والذي منو... لسا في 60% ما التزم بالربط... يعني التهرب الضريبي ضارب أطنابو وخاصة بالنسبة لكبار المكلفين... وبالأخير بتزيد أعباء الجباية من جيوب المواطن العادي بحجة زيادة موارد الخزينة... لك ح تبقى عوجة وعجرة ومالها حل...!

يقول الخبر: أحمد السواس عضو مجلس إدارة الجمعية الحرفية للألبان والأجبان: أهم أسباب ارتفاع المشتقات خلال الأسابيع الماضية هو ارتفاع أسعار الأعلاف وقلة حوامل الطاقة، لافتاً إلى وجود نيّة لإصدار تسعيرة جديدة في الفترة المقبلة، إلّا أنه لضعف القوة الشرائية وانخفاض نسبة الاستهلاك المحلي تمّ التريث بالقرار.
تعليق: واوووو.. شي مو معقول... تريث بقرار زيادة الأسعار بسبب ضعف القوة الشرائية... فعلاً عجبة... لك ياريت لو كل الجهات تعمل هيك وتتريث بقرارات زيادات الأسعار... علماً أنو الأسعار سلفاً عم ترتفع بالأسواق... بقرار أو من دون... يعني نحنا ما استفدنا شي إلا زيادة التمنين... بس هالمرة من غير الرسميين...!!

يقول الخبر: الهيئة الناظمة للاتصالات: تمت الموافقة للشركات الخلوية على تسهيل بيع الخطوط الخلوية عن طريق الهوية اللبنانية مع سمة الدخول أو عن طريق جواز السفر إضافةً إلى منح باقات إنترنت مجانية لهم، وعلى أن تقوم الشركات بإرسال سيارات جوّالة لمناطق محددة لتمكين الأخوة اللبنانيين من شراء الخط الجديد بكل سهولة.
تعليق: الله يعطيكم العافية ع المبادرات الإيجابية والمشكورة... بس ياريت لو تتكرمو بتعميم هالميزات ع السوريين الداخلين من لبنان بهالظروف كمان... والأهم ياريت لو تتكرمو وتساعدو ع إلغاء جمركة الجوالات... هيك بتكون المبادرات اللي عليها العين... مو تسهيل بيع خطوط وباقات مجانية!!

يقول الخبر: تبدأ وزارة التربية وبالتعاون مع منظمة اليونيسف حملة لتوزيع مكملات الحديد وحمض الفوليك على طالبات المدارس بأربع محافظات (دمشق- ريف دمشق - اللاذقية - حلب)، علماً أن المرحلة العمرية المستهدفة من 12 لغاية 18 عاماً للوقاية من فقر الدم وتستهدف في مرحلتها الأولى الفتيات كونهن أكثر عرضة لفقر الدم من الذكور، وذلك بناءً على مسح فردي أجري خلال عام 2022 على طلاب المدارس.
تعليق: لك كل طلاب المدارس بحاجة لمكملات ومتممات غذائية... مو بس الحديد وحمض الفوليك... ولا بس الطالبات... ولا بس بالمحافظات المذكورة... يعني الإعلان كأنو لرفع العتب والترويج انو الوزارة عم تشتغل...!!