خبر عام وتعليق هام... ارتفاع الجلطات القلبية والدماغية لدى الشباب!

تعليق: يمكن من الطبيعي تكون هيك النتيجة والمخفي أعظم.. لأن مو قليل اللي صار وعم يصير بالبلد وناسها.. وخاصة بسبب الحكومة وسياساتها الظالمة بحق العباد.. وفوقها بتعمل الحكومة حالها ما بتعرف بهيك نتائج كارثية!!

يقول الخبر: خلال جلسة الحكومة تمت مطالبة الوزارات المعنية بالتنسيق مع الفعاليات الاقتصادية والتجارية والأهلية وإطلاق عدد من الأسواق الخيرية في المحافظات بأسعار مخفضة وتقديم المساعدات للعائلات الأكثر احتياجاً بالتعاون مع الجمعيات الأهلية، والحرص على توفير مختلف السلع خلال شهر رمضان المبارك.
تعليق: كأن الحكومة مالها علاقة أبداً بالمواطنين والأسواق.. ولا من مسؤولياتها أنو في ناس صارت محتاجة للمساعدات بسبب سياساتها الإفقارية... وبكل لا مبالاة بتحمل الجمعيات الأهلية هي المسؤولية.. لك شو ممكن نسمي هيك حالة رسمية؟!

يقول الخبر: مستثمرو الأمبيرات في ريف دمشق يهددون بالتوقف عن العمل بسبب التكاليف العالية التي يتكبدونها!!
تعليق: قال يا فرعون مين فرعنك.. بس يا ترى التهديد للناس ولا للمحافظة اللي حددت سعر الكيلو واط؟! إذا للناس فصار شي طبيعي لأن الحكومة نفسها كانت سباقة وبتهدد فيهم ع الطالعة والنازلة فما عتب ع أصحاب مولدات الأمبير المدعومين... أما إذا كان التهديد للمحافظة والحكومة فما منعرف شو ح يكون الرد عليه.. بكل الأحوال استغلال الحاجة للكهربا أصلاً السبب فيه هو الحكومة ذاتها.. ويمكن أحسن رد أنو الحكومة تأمن الكهربا.. بس عبث.. دافنينو سوا!

يقول الخبر: أمين سر غرفة زراعة دمشق: التصدير بريء.. تكاليف الإنتاج هي المتهمة برفع أسعار الخضراوات والفواكه في الأسواق!.
تعليق: لك الناس الجوعانة ما عاد همها مين المتهم ومين البريء.. بدها سلتها بلا عنب.. ومع هيك فينا نقول أنو الكل متهم.. من الحكومة لتجار أسواق الهال للمصدرين.. والضحية هو المفقر دائماً وأبداً!.

يقول الخبر: «مدير عام مؤسسة الدواجن: إن أحد الأسباب الرئيسة لانخفاض أسعار الفروج والبيض، هو انخفاض القوة الشرائية للمواطنين. وإن السبب الأهم وراء انخفاض أسعار البيض دخول كميات كبيرة من المادة بطرق غير قانونية، وهو ما أسهم في انخفاض في السعر».
تعليق: هالحكي الرسمي صحيح بالنسبة للقوة الشرائية للمواطن.. بس كمان فيه كتير مصايب تانية.. لك كيف في بيض دخل بكميات كبيرة بطرق مو قانونية.. ومين اللي غطى ع هيك تهريب ومين المستفيد.. وكمان بيعني أنو الناس مو عارفة شو عم تاكل.. وأصحاب منشآت الدواجن يمكن يتوقفوا عن العمل.. يعني كتلة مصايب دفعة وحدة.. والحكومة نايمة عليها!