خبر عام وتعليق هام.. «في أماكن الألعاب تم تسجيل حالتي وفاة لطفلين نتيجة نزف دماغي»

تعليق: مو غريب تزايد عدد الإصابات... لأن إذا ما بدنا نشكك بموضوع الصيانة فمنعتذر آسفين ع موضوع الرقابة... وإذا كانت الرقابة موجودة فمنحب نقلكن إنو وجودها وعدموا واحد... لأن المصاري بتتجاوز أكبر مخالفة.. والنتيجة انو حياة أطفالنا هي اللعبة.. متل جوعن وبردن ومرضن كمان...

يقول الخبر: «يرى وزير الكهرباء أن الحل الأمثل لأزمة انقطاع الكهرباء وتقنينها لساعات طويلة يكمن في استخدام الطاقات المتجددة، كتركيب سخانات المياه الشمسية، واللواقط الكهروضوئية وبعض العنفات الكهروريحية الصغيرة على أسطح المنشآت الصناعية وغيرها».
تعليق: لك دخيل ها الحل الأمثل إذا في أهضم منو بكل الكرة الأرضية... الحكي بالملايين والجيوب مافيها ملاليم.. لك كل المنشآت الصناعية والمنزلية والمواطنين مستعدين ع أكمل وجه إنو يركبوا ألواح الطاقة واللواقط الكهروضوئية وغيرها من اقتراحات لحل مشكلة الكهربا بس شرطنا الأساسي تكون ع حساب الجيوب العمرانة بمصراااااااااااااااتـناااا.... من النهب والسرقة.. وإلا كل ها الحل الأمثل ح يبقى خلّبي عين أمك..

يقول الخبر: «تموين دمشق يحدد سعر كيلو شرحات الدجاج بـ 17500 ليرة وصحن البيض بـ 13000 ليرة والفروج البروستد بـ 26 ألف ليرة».
تعليق: والله مو غريب ع التموين هيك شي.. سعرا بسعر الكل.. أدن من طين وأدن من عجين... بالأساس بتكون الأسعار الفعلية بالسوق سابقة لتوقعاتن وتحديداتن... بس لو نفهم ع شو وليش بتطلع هالنشرات.. طالما هية وقلتها واحد..

يقول الخبر: «محافظة دمشق رفعت مؤخراً تسعيرة نقل أسطوانات الغاز الصناعي والمنزلي، ما أدى إلى ارتفاع أسعار المادة وفق آلية البطاقة الذكية وخارجها».
تعليق: منين بدك تقنع يلي برا البلد يرجعوا ع أرض الوطن وهنن شايفين مسائيلنا كيف طالعين- نازلين ع سحب عملة من جيبتنا وع حسابنا؟؟؟ وبعد هل الارتفاع مع سلسلة الارتفاعات التانية.. كلنا سوا مع بعضنا صفقوووووووولن..