كان لافتاً خلال اليومين الماضيين جملة المحاولات المستميتة التي بذلها وفد الرياض للتأثير سلباً على مسار مفاوضات جنيف3

يبدو جلياً أن التوازن الدولي الجديد بانعكاساته الإقليمية والسورية بات يلزم معسكر واشنطن وأتباعها ليس بالبحث عن تعديله لصالحها- بحكم إدراكها لاستحالة هذه المهمة في ظل الهجوم المعاكس من الكتل المناوئة- بل باتت تكتفي بمحاولات تثبيته توجساً من وتيرة أسرع في تراجعها.

• صباح الخير أستاذ اتفضل قهوتك..
• شكرا يا أم علاء.. يسلمن.... خير شبك؟ كأنو بدك تحكي شي.. «في فمك ماء» هههه..!

يعني بتكون قاعد بأمان الله عم تتأمل أنو تنفرج أوضاع البلد.. فجأة بيجيك خبر محاولة الحكومة الرشيدة بهالوقت المفصلي من حياة البلد وروحتها ع الحلول السياسية خصخصة قطاع الاتصالات الخلوية و(التخلي طوعاً)عن حقها باستعادة أو تأميم هذا القطاع الاستراتيجي الريعي الكبير بعد ما خلصت عقوده الاستثمارية.. 

شكون يالله! النصرة وداعش هلكونا كنا بكم حرامي صرنا بآلاف الحرامية! ولا بدنا جوا الدلف ولا جوا المزريب..!
يا خوديه..! قلنا لحالنا خلصنا من إحصاء 62 إجتنا إحصاءات وعصابات وتقسيمات 2013 وخيو مين قال بدنا الدلف أو المزراب؟
إش بدي ئلك يا خيو..! لك اشتئنا للحمة الكرزية.. هلأ بانجان معفس باللبن ما عم يصحلنا.. ويا أما هاون هون أو برميل هون..! وبعدين؟
قرد..! لك بحضي وحض ولادي لك ما في ضيعة إلا رايح منها تلترباع شبابها إذا مو كلهم..! بس يا عمي بدكم تقنعوني غصب من عني إني مستفيد ومحسوب؟؟ لك تعا عيّن ها العيشة يللي عايشينها..!
خيي بدك تقللي أنو تخريب كنيسة أو سرقة تحفة بيحرر بلد؟ أو لما بيجي مسؤول بتصور على خرابها بيكون حررنا نحنا؟ ليش في حدا بدو يحطنا بالزاوية يا هيك.. يا هيك؟.. نحنا مع الناس متل كل الناس..!
الكُل علقانين.. ونحنا بالنص.. وخربت عنا كل أحيائنا وشوارعنا.. وهدول الجماعة عندهم حواجزهم وهدنك عندهم حواجزهم ومحاكمهم كمان.. وخلصنا بئا إذا بتئدر..! بس فيك تئللي شو فيك تعمل من دون نصك؟؟!
والله والله ومحمد رسول الله..! حنا نشامى وترانا أصبر من الصبر.. ولكن ما نقبل الضيم لا من عدو ولا من صديج..!
مالكم ناويين تهنونا؟ هاون هون وقصف هون.. مناطق بيسكروها هدول ومناطق بيسكروها هدول.. هدول بيحطوا الناس بالأقبية والتانيين بيطلعوا نفس الناس ليحطوهم بالفلا.. عجئة ومرة حواجز قصيرة ومرة حواجز طويلة.. وفوق الموتة عصة قبر بالأسعار وبالتشرد والنزوح وبخربان البيوت وقطع الأرزاق وفوقها الأعناق.. إيه وبعدين بئا معكم..؟
عمي.. لما تحركنا كنا ضد الظلم والاستهتار والسرقة! وإلتعن سلّاف سلّافنا.. واتحملنا كتير واخترقونا كتير.. وهاللحذ صرنا بين صفاقين.. بس يعني بالآخير لقربلك ياها: شنو يعني راس بدون أطراف أو أطراف بدون راس؟ وشنو يعني كل هذول إذا ما كان الجسم صحيح؟
يا خيي.. يا حببيي.. قد ما التعب بالبلد وأهله طرة أو نقش.. رح تنقلب عليهم كلهم لقش! لأنو يا قباري وسندي.. قد ما حطوا حجارة مخفية تحت المي.. ما بيضل بالوادي غير حجارو..!

الفهمانين يللي عم يفصفصوا القنابل الطائفية ويتفتفوها هون وهون مفكرينها صحن موالح أو بزورات يرحموا ها البلد والناس شوي..! هي مو لعبة.. ولا فشة خلق.. هادا حكي بيحرق الأخضر واليابس..!
وياريت ما حدا يكفرنا أو يتهمنا بالعمالة سلفاً.. ع أساس أنو يابا: «يللي أيدو بالمي مو متل يللي أيدو بالنار».. وكأنوا نحنا من المريخ..! يا ريت تنتبهوا لشو يللي عم بيصير.. وشو عم يضخوا المتشددين تبع كل طرف منكم بروسكم..
أخي أنت وياه.. من جمهور هدول أو هدول.. النظام بكل ممارساته واستبداده مو يعني إنها باسم طائفة بعينها.. وبنفس الوقت الوهابية السعودية بكل الهمجية تبعها مو يعني طائفة تانية.. يعني القصة متل حرامية البلد بشراكاتهم وصفقاتهم هنن عابرين للطوائف.. يعني مالهم من طائفة وحدة ولا هنن من طائفة تالتة..!
أما أنتو يا متشددين.. شوي يللي حرككم دفعة واحدة متل الأوركسترا؟ أنت يا علماني- ع أساس- يللي مرة بتطالب بأنو «هي الطائفة لازم ترد ع التانية».. ومرة «التانية لازم تبيد الأولانية».. لوين رايح بها المنطق وأنت كلك ع بعضك- وبعضمة لسانك- واحد عم يطلب تمويل؟ ومشان شو..؟ آل مشان تقدر تستمر بتواصلك مع «أصدقائك» الأمريكيين لـ«شرح القضية»..! وأنت يا فهمانة يللي عاملة حالك ثورجية وبدك تدعسي وتمعسي.. ما في طائفة هي «أمة» بحد ذاتها.. ومتل ما بيقولوا المثقفين «لا تهرفي بما لا تعرفي»..! ودخلك بشو عم تفرقي عن «المنطق الإقصائي» تبع النظام يللي عم تقولي إنك ضدو.. فيا ريت تفهمينا أنت ضد شو بالظبط؟ وأحلى شي هداك اللبناني يللي بيقول أنو في أبناء أقلية دينية محددة بسورية لازم يتسلحوا.. وهو مستعد يمول ويسلح..! وواحد رابع بأقصى الشمال بدو يشكل مجلس عسكري لأقلية تانية..! وخامس بدو الإعلام الرسمي يسميها- يعني يطلقها «حرب طائفية»..! يا وبش أنت وياه وياها.. وين رايحين بالعجقة؟ وين بدكم البلد تروح مشان تنبسطوا بتنظيراتكم وإطلالاتكم الإعلامية..؟ لك يخرب بيتكم.. قبل بسنة كنتوا رح توصلونا لهي الحرب بس نحنا.. يعني «المجتمع السوري» لفظناها ولفظانكم..! هلأ شو بدكم؟ بدكم يانا نصير متلكم وكل ما اندعس ع طرف لألنا يطلع «الطائفي أو العرقي الصغير» يللي جواتنا يا أما «شبيحة» يا أما «دبيحة»؟ لحد هلأ بقلكم ما حزرتوا..! بس بدم مين عم تلعبوا؟ لك ما في بيت بسورية.. وما في حدا بسورية من أقصاها إلى أقصاها إلا ملتاع أو متأثر- وبغض النظر عن كيف وليش- يا أما بخسارة أب أو أم أو جد أو أخ أو زوج أو زوجة أو أبن أو ابنة أو قريب أو جار أو صديق أو زميل أو حتى معرفة؟ بدكم تولعوها أكتر وما تخلوها تنحل لحتى ما تخسروا مكاسبكم؟