خبر عام وتعليق هام... تعليم الطلاب «مهارات قانونية»!
يقول الخبر: قاضي ومستشار في مجلس الدولة: سيتم تعليم الطلاب «مهارات قانونية» من خلال أنشطة لا صفية ومهارات حياة كمواد تعلم في المدارس دون إدراجها في المنهاج. وذلك عبر مصفوفة معايير قانونية أعدت بمشاركة فئات مختلفة من المختصين من مركز تطوير المناهج والقانون وغيرها، وستوجه إلى المراحل العمرية كافة من الصف الأول إلى الصف الثاني الثانوي، وبما يتناسب مع كل منها اختير حوالي 47 مبدأ قانونياً بما يمنح الفائدة للطالب ضمن حياته لينطلق إلى الحياة في المجتمع.
تعليق: واوووو.. لك شو هالنقلة النوعية بالمناهج والتعليم... بس يمكن الأفضل لو يلمس الطلاب حقوقهم لمس اليد ع حياتهم وضروراتها أفضل من انو يسمعوا عنها سمع... يعني مثال عملي عن الحقوق المصونة أحسن من معلقات عن المهارات القانونية... مو هيك؟!!
يقول الخبر: عضو المكتب التنفيذي وأمين السر في اتحاد عمال دمشق: إن نسبة الاستقالات ارتفعت بشكل كبير نتيجة الوضع الاقتصادي، والتضخم بالأسعار أدى إلى تدني قيمة الأجور مقارنة مع ارتفاع أسعار المنتجات التي أصبحت مرتبطة بالأسعار العالمية.
تعليق: هالحكي مو جديد... سبق وتكرر كتير على مسامع الحكومة اللي عاملة أذن من طين وأذن من عجين... بالرغم انو جهاتها العامة هي المتضرر الأكبر من نزف الكوادر فيها... بس يبدو أنها قبلانة ورضيانة مشان تستكمل إنهاك مؤسسات الدولة... مو هيك؟!!
يقول الخبر: المؤسسة العامة للتأمين في سورية تطرح منتجاً تأمينياً جديداً يغطي منظومات الطاقة الشمسية المركبة على أسطح المنازل!
تعليق: يا اخي شو شاطرين أصحاب الأرباح كيف بيستفيدوا من كل شي عم يصير وبيجيروه مباشرة لمصلحتهم... بس كمان المشكلة مو هون وبس... المشكلة الحقيقية إذا بيصير هالتأمين إلزامي... لأن أبداً مو غريبة توافق الحكومة ع هيك شي طالما القصة فيها أرباح سهلة وسريعة لمصلحة شركات التأمين!
يقول الخبر: نقلاً عن صحيفة تشرين: 25 مليون تكلفة القسطرة والشبكة بالمشافي العامة... نقابة أطباء دمشق: الفحوصات والعملية على نفقة المشافي وتأمين المستلزمات يتحملها المريض!
تعليق: يعني كتر خير الله انو لسا الفحوصات والعملية ع المشافي العامة... بس الفقير ع هالحالة مصيره الموت طبعاً... لأن يوم بعد يوم عم ينجبر انو يستغني عن صحته طالما المشافي العامة اللي مفترض إنها مجانية صارت مأجورة وبهيك مبالغ مليونية!!
يقول الخبر: تشغيل العنفتين الأولى والخامسة في المحطة الحرارية في حلب بعد نحو شهرين من تشغيل إحداهما فقط، لعدم توافر الغاز والفيول، ما يزود الشبكة الكهربائية بحوالي ٢٠٠ ميغا واط إضافية!
تعليق: يعني الأهالي بحلب لا حسوا انو في عنفة وقفت ولا عرفوا انو رجعت اشتغلت... لأن الكهربا ع حالها من السوء... توفر الغاز والفيول للمحطة الحرارية ولا ما توفر... يعني هيّه هيّه بالنتيجة وما في داعي للتوضيحات اللي لا بتقدم ولا بتأخر!!
يقول الخبر: محافظ دمشق: تشكيل لجنة للتحقيق في حادثة سقوط السور قرب رئاسة الجامعة واتخاذ الإجراءات اللازمة بحق المقصرين.
تعليق: ههههه فعلاً شر البلية ما يضحك... يعني بعد ما وقع الفاس بالراس ووقع المواطن الكفيف بالنهر بسبب السور والله نجاه منها... فاقت المحافظة وصار بدها تحاسب المقصرين... يعني كأن المحافظة ما دخلها وما عليها حكي... لك فعلاً يا هيك التهرب من المسؤوليات يا بلا!!
معلومات إضافية
- العدد رقم:
- 1202
