خبر عام وتعليق هام.. ضبط عصابة إتجار بالأعضاء البشرية في دمشق!

تعليق: طبعاً الحكي عن عمليات نقل الكلى من الأصحاء للمرضى لقاء مبالغ مالية.. وهاد الشي.. بغض النظر عن اعتباره جريمة بحسب القانون.. فهو مؤشر عن الفقر بالبلد اللي بيخلي الواحد يبيع كلاويه.. وع هاد الأساس يمكن المفروض إعادة النظر بالجريمة والجرم والمجرم.. لأن الإفقار هو الجريمة بذاتها..!

يقول الخبر: وزير الصناعة الدكتور عبد القادر جوخدار خلال ورشة العمل التخصصية التي نظمتها غرفة صناعة حمص، أكد أن صناعة الزيوت والسمون من الصناعات الهامة التي تدعم الاقتصاد الوطني، وأن انعقاد هذه الورشة التخصصية لبحث مشاكل الصناعيين ووضع الحلول بالتنسيق مع الوزارات المعنية، مبيناً أنه تم بنهاية أعمال الورشة تشكيل لجنة متخصصة لتحديد الصعوبات، وأهم الحلول، لتذليلها بالتنسيق مع اللجنة الاقتصادية والوزارات المعنية.
تعليق: قال تحولت المطالب للجنة متخصصة.. لك كلنا منعرف كيف بتشتغل اللجان.. وانو ما بيطلع معها شي بالنتيجة.. طيب ليش اللجنة طالما الوزير نفسو موجود وحكى وسمع.. وبنفس الوقت هو صاحب قرار المفروض مباشرة يصدر كم قرار لحل بعض المشاكل اللي تم عرضها بالحد الأدنى.. ولا الوزير مو صاحب قرار وما بيمون حتى ع اللي بيخص وزارتو من مسؤوليات!!

يقول الخبر: مدير التربية: الاعتراضات على الامتحانات المؤتمتة تأتي من المتضررين منها!
تعليق: يمكن هالحكي مو كتير دقيق.. لأن في كتير معلمين دونوا ملاحظاتهم الكتيرة ع نمط الامتحانات المؤتمتة التجريبية اللي صارت.. وبالحد الأدنى أنو هيك عملية مشان تكون ناجحة وتحقق المطلوب منها كان لازم تبدأ كتجربة من الصفوف الانتقالية، وتتعم منها مو من الشهادات.. مع تسجيل الاستغراب من التسرع بتطبيق الأتمتة ع امتحانات الثانوية للعام الحالي.. طيب ليش العجلة!!

يقول الخبر: وزيرة التنمية الإدارية: كتلة الرواتب بعد تطبيق الحوافز ستكون متقدمة، وسيتم النظر بفتح سقوف الرواتب!
تعليق: يعني شو الاستفادة من فتح سقوف الرواتب.. مشان الترفيعات الدورية المسقوفة مثلاً..؟! لك المشكلة لا بكتلة الرواتب ولا بفتح السقوف.. المشكلة بالراتب القليل نفسو اللي بتنحسب الحوافز والترفيعات عليه.. بس ما في أمل على ما يبدو ع ايدين الحكومة!!

يقول الخبر: أيضاً وزيرة التنمية الإدارية: قانون العاملين الموحد نقطة سوداء في تاريخ الإدارة في سورية!
تعليق: يمكن تاريخ الإدارة بسورية في كتير نقاط أشد سواداً من قانون العاملين الموحد.. طبعاً هاد ما بيعني انو القانون ما عليه ملاحظات.. بس بكل الأحوال ما ح نستبق الأمور.. لنشوف قوانين العمل البديلة اللي عم يصير عليها الشغل من وزارة التنمية الإدارية هلأ.. وبعدين منشوف وين السواد؟!

يقول الخبر: أوضح مدير كهرباء دمشق لؤي ملحم، أن زيادة ساعات التقنين الكهربائي مرتبطة بالكميات الواردة، إضافة لتضاعف الأحمال على الشبكة خلال الشتاء.
تعليق: يعني شو الجديد بهالتصريح.. قديم ومكرر وممجوج وممل.. كل مرة نفس المبررات والذرائع.. والوضع من سيئ لأسوأ بالكهربا.. لك ما عاد ممكن ينحكى عن فترة التزود بالكهربا أنها تقنين.. هاد شبه انعدام للكهربا..!!

يقول الخبر: مدير مشفى أباظة الدكتور بشار حلاوة: المشفى من دون أطباء اختصاصيين (صدرية، أوعية دموية، كلية) والجراحة متوقفة لعدم وجود طبيب تخدير.
تعليق: حديث مدير المشفى كارثي.. وممكن تعميمه ع المستوى الصحي اللي وصلت ألو المشافي الحكومية.. يعني المشافي الحكومية عملياً عم تشتغل بالحدود الدنيا.. وكل هاد بسبب الحكومة، وخاصة سياساتها الأجرية والتوظيفية اللي خلّت الكادر الطبي يطفش من البلد..!