خبر عام وتعليق هام! اتفاقية «الكوريدور الأخضر» مع روسيا متوقفة منذ نحو سبع سنوات!

تعليق: الأكيد انو حيتان الاستيراد الهم مصلحة بتوقيف هاد الكوريدور.. لأنه بالمضمون يعني تبادل السلع الزراعية وفق مبدأ المقايضة.. بدون دفع مبالغ إلا الفروقات بس.. وهاد بيفضح حقيقة أرقام عمليات التصدير والاستيراد.. وخاصة حجم الأرباح.. وبيضيع الهوامش الإضافية بحجة العقوبات كمان.. فإذا عرف السبب بطل العجب.!!

يقول الخبر: كشف مستثمر الباصات الكهربائية التي سيتم استيرادها من الصين، أنه سيتم استيراد باصات لتخديم 7 محافظات بالتوازي مع إنشاء محطات كهروضوئية لشحنها. وأوضح أن عدد الباصات التي تم الحصول على الموافقة على تشغيلها يصل إلى 2035 باص!
تعليق: واوووو.. لك نحنا بهداك اليوم اللي نشوف فيه باصات كهربائية بشوارعنا تحل مشكلة وأزمة المواصلات.. وعلى ما يبدو ح تنحل من شرشها كمان.. وبكل المحافظات دفعة وحدة.. يعني يا هيك الاستثمار المربح يا بلا.!!

يقول الخبر: تعكف اللجنة الخاصة بتعديل قانون مكافحة التسول على صياغة التعديلات المطلوبة، التي من شأنها معالجة هذه الظاهرة، التي بدأت تشكل خطراً واضحاً على المجتمع.
تعليق: لك الخطر ع المجتمع مو بس من الظواهر السلبية والشاذة اللي عم تتغلغل فيه.. الأهم، هي الأسباب اللي عم تخلي هي الظواهر تزيد وتتفاقم.. يعني بالمختصر لولا السياسات الشاذة ما كانت هَي الظواهر الشاذة انتشرت أصلاً.. يعني احكوها وعالجوها صح.. وبلا لف ودوران.!!

يقول الخبر: أعلنت وزارة المالية عن تعديل نسب الأرباح الصافية لبعض الفعاليات والأنشطة الخاضعة لضريبة الدخل على فئة الدخل المقطوع، ووصلت نسبة بعضها إلى 48%!
تعليق: التعديل الجديد أثبت حرص المالية، وطال حرفاً ومهناً وورشات، ومحلات بيع، وصيادلة وأطباء أسنان وغيرها من الشرائح، التي انحدر مستواها المعيشي بشكل كبير خلال السنين الماضية.. بس يا ريت لو كانت وزارة المالية حريصة على جباية حقوقها الضريبية من شريحة كبار أصحاب الأرباح الحقيقيين كمان.. بس هدول معفيين من الضرائب، بحسب بعض القوانين.. وغير هيك فهَي الشريحة شاطرة بالتهرب الضريبي والإفساد كمان وكمان.!

يقول الخبر: ركّز الاجتماع التنسيقي الذي عقد اليوم في مبنى محافظة اللاذقية بحضور محافظي اللاذقية وطرطوس على وضع استراتيجية واحدة لاستكمال عملية تسويق موسم الحمضيات الحالي، والتسهيلات اللازمة لذلك، والأدوار المطلوبة من كل جهة لاستكمال تسويق الموسم الحالي.
تعليق: لك الموسم ح يخلص ولسا بدهم يتفقوا ع استراتيجية لتسويقه.. لكان شو كان عم يصير بعد الاجتماعات التنسيقية السابقة.. ووين صار كل الحكي الرسمي عن خطط التسويق ومصلحة المزارعين من كذا شهر.. يعني تيتي تيتي ح تبقى المشكلة مستمرة وما ح تنحل ابداً!