خبر عام وتعليق هام.. رفع سقف القرض السكني إلى 200 مليون ليرة!!
يقول الخبر: المصرف العقاري: رفع سقف القرض الشخصي ليصبح 25 مليون ليرة بدلاً من 10 ملايين، والقرض السكني إلى 200 مليون ليرة، والتنفيذ بداية عام 2024.
تعليق: يا ترى لمين هي القروض.. أكيد مو للمعترين من أصحاب الدخل المحدود؟! لك القرض السكني ع مدة 15 سنة تقسيط بيطلع القسط الشهري تبعو أكتر من مليون ليرة.. مين اللي قادر ع تحمل هيك قسط غير حرامية البلد؟!
يقول الخبر: وزير التربية: سيتم السماح باستقالة المعلمين والمدرسين الذين أمضوا في الخدمة 30 عاماً!
تعليق: هلأ من المفروغ منو انو الحقوق صارت تمنح بالقطارة مع سفق منية كمان.. بس اللي فرض ع وزارة التربية هالخيار المجحف بالحقوق ع حساب المعلمين هي السياسات الأجرية وسياسات التعيين وغيرها من السياسات الجائرة.. يعني مو من قليل كل اللي عم يتكرس من سلبيات بقطاع التعليم.!
يقول الخبر: اعتمد مجلس الوزراء مذكرة وزارة الزراعة والإصلاح الزراعي المتعلقة بدعم المحاصيل البقولية، وبذار القمح المحسن، واستبدال أشجار الحمضيات الهرمة، أو الهالكة، أو المتدهورة بشكل مجاني، كما وافق على خطة صندوق دعم الإنتاج الزراعي للعام 2024!
تعليق: لك عن أي دعم للمحاصيل عم يصير الحكي الحكومي.. السماد صار بالعلالي.. والمحروقات بالقطارة.. والمحاصيل عم تتراجع.. والحمضيات مشكلة مزمنة بدون حلول جدية لهلأ.. وفوق كل هاد الناس صارت محرومة حتى من البطاطا اللي كانت أكل الفقير بعد ما وصل سعرها لأكتر من 7 آلاف ليرة.. عنجد الحكي ببلاش.. والمزاودة ع البيعة.!
يقول الخبر: يحدد سقف السحب للحركات المتبادلة للبطاقات المصرفية المصدرة من أي من المصارف العاملة على أجهزة الصرافات الآلية العائدة لبقية المصارف الأخرى بـ 200 ألف ليرة كسقف سحب للحركة الواحدة، وكسقف للسحب اليومي، وتحدد عمولة السحب النقدي بمبلغ 1000 ليرة، والاستعلام عن الرصيد 500 ليرة!
تعليق: يعني فعلاً مالنا صار علينا صدقة وفوقها ابتزاز.. لك كيف وليش ولمصلحة مين يكون في سقف للسحب اليومي ما حدا بيعرف؟!! وطبعاً هاد مشان التشجيع ع آليات الدفع الإلكتروني اللي صار توجه حكومي مفروض ع العباد.. اما شو تشجيع متعب ومكلف ع حساب الناس؟!!!
يقول الخبر: نفت وزارة الزراعة أن ما يشاع عن انتشار مرض نيوكاسل على الدواجن، أو ما يسمى شبه طاعون الدجاج ،وتسببه بنفوق كبير بقطعان الدواجن عار عن الصحة، واعتبرت أن هذه الشائعات، تضر بمربي الدواجن، وتستخدم لرفع الأسعار إلى مستويات غير منطقية!
تعليق: النفي الوزاري كان لخبر ع لسان عضو مربي الدواجن «حكمت حداد» لإذاعة ميلودي.. يعني واحد مختص وبيعرف شو عم يحكي مو إشاعة ابداً.. ما علينا اللي بيهمنا انو أسعار الفروج ما عم توقف ودائماً بطلوع.. واللي مهم أكتر شو ح تعمل الوزارة بحال نزلت القطعان النافقة ع الأسواق للبيع والاستهلاك.. ولا النفي تبعها بيعفيها من هيك مسؤولية؟!
يقول الخبر: مدير مياه دمشق: لم يرد للمؤسسة شكاوى عن وجود معاناة بعدم الحصول على المياه!!
تعليق: لك معقول مدير المياه ما بيعرف انو في مشكلة مياه عم تعاني منها الناس من سنين.. وعم يستنى الشكاوى لهلأ!! ولوووو شو هالانفصال عن الواقع عند الرسميين.؟!!
يقول الخبر: بين معاون مدير المؤسسة العامة لحلج وتسويق الأقطان يوسف نفوس: أن إجمالي الكميات المسوقة من محصول القطن المحبوب لتاريخه لهذا الموسم بلغت 12,559 طنا،ً مشيراً إلى أن الكميات المتوقع استلامها لنهاية العام تقدر بنحو 14,373 طناً من المناطق الآمنة، علماً أن المخطط حسب وزارة الزراعة بحدود 18 ألف طن.
تعليق: من المؤكد انو هي الكميات الضئيلة نتيجة التضحية بمحصول القطن خلال السنين الماضية.. والنتيجة الأسوأ، انو المحالج العامة البقيانة بتشتغل بطاقتها الإنتاجية للكميات المستلمة، وبعدها بتوقف عن الشغل طبعاً.. وكل هاد ولسا الحكومة مستمرة بالتضحية بالمحصول وبالصناعات المرتبطة فيه.. أما شو مسؤولية وواجبات ومحاسبة مغيبة؟!!
معلومات إضافية
- العدد رقم:
- 1151
