خبر عام وتعليق هام.. «الفئات الأقل دخلاً والأشد فقراً في سورية لم يتحسن مستواها المعيشي جرّاء استبعاد حوالي 600 ألف أسرة من الدعم»

تعليق: ترفع القبعة للعمل الحكومي الحقيقي يلي عم يخلي الفقر ينخر بـ عظام الشعب.... من هون لكم شهر ومع الجهود يلي عم تبذلها الحكومة ما عاد ح يبقى شي اسمو دعم!!! هاد غير ارتفاع أسعار المواد كلها بالأسواق.. وبهل الطريقة بتكون الحكومة عم تسد جزء من العجز المالي ع حساب المعدمين من شعبها...!!

يقول الخبر: «خطط حكومية لاستقطاب السياح إلى سورية.. ومنصة إلكترونية لتسهيل الحصول على تأشيرات لدخول البلاد».
تعليق: منشان الأمانة الفكرة لا بأس فيها.... يعني حاجتا سورية لازمها نعنشة اقتصادية عيار1000 فولط لتنفض نفض... بس يا حبيباتي هل الخطوة الهامة بدها هز كتاف عجيب... يعني إذا المنصة مصيرها متل مصير المنصة شيت جواز السفر والوزارات والذي منو.. أي احاااااا... هاد ما فتنا بتفاصيل البنية التحتية والخدمات المعدومة.. وطبعاً هون عم نحكي ع الكهربا أقل مثال.... تخيلوا يا يرعاكم الله السائح يمشي ببلودان ع ضو فلاش موبايلوا مثلاً!!!! لك عااااااايب بحق البلد...!

يقول الخبر: «وزارة الاتصالات والتقانة استبعاد الآليات التي تتجاوز سعة محركها (1500-سي سي) وتاريخ صنعها 2008 من الدعم الحكومي».
تعليق: العمل الحقيقي- الجاد- لعملية اكتمال رفع الدعم الحكومي كلياً بالتدريج عن كافة فئات الشعب... ناقص بس يقولوا بدنا نرفع الدعم عن السيارات التي تتمتع بأربع دواليب!!! يا رب مستقبلاً ما يركبولنا جهازGPS ليشوفونا كيف منروح ومنجي ع رجلينا ويرفعوا الدعم عن مستخدمي رفاهية القدمين للتنقل...!!

يقول الخبر: «بسبب الكميات الوفيرة.. مسؤول: سعر البطاطا سيكون مستقراً لعام كامل ولن يزيد عن 1500 ليرة».
تعليق: يعني نقلب غذائنا كلو للبطاطا مثلاً؟؟؟ هههههههه لك كل مادة بتتصدر بيدوبل حقا للضعف.... مثلاً عندك الثوم قبل قرار تصديرو كان بـ 2500 ليرة وبعد القرار وصل للـ 10 آلاف!!!! يعني معادلتكن فاهمينها منيح.. وبالمناسبة سعر كيلو البطاطا بالسوق 3000 ليرة حبيباتي...!

يقول الخبر: «أكد تجار سوق الهال، أن أسعار الفواكه ارتفعت أكثر من 50% عن السنوات السابقة، مضيفين: بات الاستطعام بالفواكه المحلية لغالبية المواطنين ضرباً من ضروب الرفاهيات التي استغنوا عنها وحلّ محلها البحث عن وجبة طعام بأدنى سعر موجود في السوق».
تعليق: متل هل التصريحات بترفع الراس عنجد... لما يصير خيرنا لغيرنا بفعل حكومي حقيقي!!! وللأسف ما وقفت بس اختصارات الشعب ع الفواكه.. لأن الناس بالأساس عامل كنسلة كُلية ع عدد وجبات الأكل واختصار بالأطباق والأصناف الأساسية والمهمة.. وبقيانين عم يتغذوا ع أي شي ليقدروا ينامو شبعانين بالحد الأدنى... فعلاً بينطبق المتل يلي بيقول «يلي استحوا ماتوا»...!!