خبر عام وتعليق هام «قال رئيس اتحاد غرف الزراعة: مادام دخل المواطن منخفضاً ستبقى أسعار الخضار والفواكه مرتفعة»

تعليق: (إن عرف السبب بَطُل العجب).. بسم الله وما شاء الله... لأنو راتبنا صار متل خرجية الأهل، يلي ما بدن يكتروها كرمال ما تتفسد أخلاق ابنهن.. بس وينك يا حكومة تسمعي هالحكي اللي صار ع كل لسان.. انو المشكلة الأساس بكل مآسينا هي الرواتب الهزيلة تبعك.. ورغم هيك عاملة حالك مو سامعة ولا دريانة!

يقول الخبر: «توقع مدير الأسعار في وزارة التجارة الداخلية وحماية المستهلك، حدوث انخفاض في أسعار مختلف المواد خلال الفترة القادمة، مؤكداً أن بعضها استقر وبعضها الآخر انخفض، ومنها: الزيت والسكر، حيث شهدت انخفاضاً واستقراراً في السعر بعد طفرة من الارتفاع».
تعليق: هو منشان ضميرنا يكون مرتاح انخفض سعر كيلو البصل للـ 1200 ليرة.. أما باقي ما تبقى ارتفع سعرو ابتداءً من المواد الضارة بصحتنا، متل الدخان، وانتهاءً بالمواد الغذائية يلي عملوها كمان مضرة بصحتنا وحرمونا منها.... وطبعاً الحكي عن الحكومة واللي داعمتهم من حرامية النهار..

يقول الخبر: «فتح عضو مجلس الشعب السوري النار على الحكومة إثر القرارات الأخيرة المتعلقة بأسعار الصرف والاتصالات والقمح».
تعليق: مشكور ع كل كلمة قلتها يا سيناتور، بس والحل؟؟ يعني ما العمل اللي ح تعملو؟؟؟ لك صار حلم المواطن انو يلمس فعل حقيقي لمجلسكم بعيدأ كل البعد عن صف الحكي يلي بيقولوه ليتبروظو إعلامياً... قال فتح النار.. لك النار كوتنا نحنا.. والحكومة عليها برداً وسلاماً.. العمى ولوووو..

يقول الخبر: «قدم موقع (نومبيو) دراسة حول عدد السنين التي يحتاجها الموظف لشراء شقة بمساحة 50 متر. وحسب الدراسة خرجت سورية، من حسابات الموقع الإلكتروني بعد جمع البيانات، حول عدد السنوات التي يحتاجها الموظف للعمل لكي يتمكن من شراء شقة بمساحة 50 متراً مربعاً في مدينته، التي يعيش ويعمل فيها».
تعليق: ولك لييييشششش يااااااا عيني ليش؟؟؟ رواتبنا بتجنن... عيشتنا مثالية 100%، ومو ناقصنا إلا شوية كماليات وبإذن الله منكون ختمناها... فـ لشو طلعتونا من الدراسة بعد ما جمعتوا بيناتنا آآآآآآآه؟؟؟؟ شكلكن عرفتوا كم راتب لازم يفوت ع بيت المواطن السوري لحتى يقدر ينام وهو شبعان شوي مووووو؟ الله يريحنا من كل جبار وظالم ع أهون سبب..

يقول الخبر: «ضمن حراك الحكومة لتأمين احتياجات المحاصيل الزراعية من الأسمدة للموسم القادم، كشف مصدر حكومي لصحيفة الوطن، عن مباحثات جديدة مع إحدى الدول الصديقة لتأمين نحو 100 ألف طن من سماد اليوريا وفق مبدأ المقايضة (مقايضة فوسفات خام)».
تعليق: أن تصل متأخراً، خير من ألا تصل... وأخيراً فاقت من النوم وحركتلنا حالا هل الحكومة يلي عنا... علماً إنو هل الـ 100 ألف ما بتكفي شي... بس يا ترى الفلاحين ح يحصلوا عليه بسعر مناسب بعد كل هاد.. ولا شو الترتيب؟؟؟