خبر عام وتعليق هام.. «مؤسسة التأمين تلقي اللوم على وزارة الصحة: لم تشاورنا بخصوص رفع أسعار الأدوية والقرار سيزيد خسائرنا»

خبر عام وتعليق هام.. «مؤسسة التأمين تلقي اللوم على وزارة الصحة: لم تشاورنا بخصوص رفع أسعار الأدوية والقرار سيزيد خسائرنا»

يقول الخبر: «مؤسسة التأمين تلقي اللوم على وزارة الصحة: لم تشاورنا بخصوص رفع أسعار الأدوية والقرار سيزيد خسائرنا».

تعليق: أول الشي، حبو بعض يرضالي ع اسمكن ما بدنا نشمت الأعداء فيكن... تاني شي بردووون من خاطركن شو الخسائر يلي حتزيد عليكن؟؟؟ والله يلي بيشوفن عم يتخانقوا هيك بيقولوا خايفين ع المواطن يلي عم يعلوه ويسلوه ما يكون عندو قدرة ع معالجة نفسو... طلعت القصة- قصة خسارة إلهن... وهيك بيكونوا برهنو للكل أهدافن النبيلة....

يقول الخبر: «وزير التجارة الداخلية وحماية المستهلك، كل من يدعي أنه فاسد هو شخص كاذب وغير صادق.. البيض في صالات السورية للتجارة ليس فاسداً، وأستخدمه بمنزلي».
تعليق: لحظة لحظة... بيض بالسورية للتجارة؟؟!! ايمت صار هل الحكي بلا منؤدية؟؟ ولا توزع بصالتين تلاتة منشان الصور والبهرجة، وهل التصريح كالعادة؟؟ وبعدين كيف موفية معكن بـ 14 ألف مو ملاحظين عم تخسروا حالكن كتير كرمالنا؟؟؟ يوه يوه.......

يقول الخبر: «توقع عضو لجنة مربي الدواجن أن أسعار الفروج والبيض في سورية تسابق بعضها.. والأسعار سترتفع أكثر منذ بداية العام القادم، وما يحدث يشير إلى أن قطاع الدواجن (يحتضر)».
تعليق: يحتضر!!! لك الرسميين بدل ما يلاقو حلول ليأنقذوا قطاع الدواجن من الاحتضار شكلن عم يجهزوا مراسم الدفن والعزا!!!!!! وأكيد عم يتساءلوا أيمت الدفن ووين العزا؟؟؟

يقول الخبر: «حول الانتقادات التي طالت التوقيت الصيفي الحالي، وخروج الطلاب والعاملين في ساعات الصباح الباكر قبل ظهور ضوء الشمس، صرح رئيس الجمعية الفلكية: ردود الأفعال التي تحدث الآن تسمى بممانعة التغيير الجماعي، الرافض لأي شيء جديد 90% من دول العالم توقيتها صيفي، فلماذا تكون سورية استثناءً عن كل العالم».
تعليق: ويا ريتو ما صرح... بس عنجد عنجد لماذا تكون سورية استثناءً عن كل العالم؟؟؟ يعني بالمختصر المفيد خلونا نقلد دول العالم المتقدم ونشيل التوقيت الشتوي ببلد ما فيها كهربا ولا نفط ومشتقاتو ومصنفة عالمياً من الدول تحت خط الفقر وفيها مجاعة.. بس الأهم من هل اللعي يلي بلا طعمة ما تكون مستثناة من التوقيت الصيفي ع مدار السنة...

يقول الخبر: «رئيس جمعية الصاغة: نقوم بتسعير الذهب على دولار يساوي 5,560 ليرة وهو ما نعتبره سعراً وسطياً بين المركزي والسوق غير النظامية».
تعليق: هلق السوق غير النظامية هية نفسا السوق السودا قصدوا فيها؟؟؟ لك عمي شو بيهمنا نحن كشعب بردان وجوعان ومرضان بسعر الذهب؟؟ هيك هيك ما ح نحصل عليه غير بأحلامنا الجميلة... إذا بتركزولنا ع المواد الغذائية وأزمة المواصلات والتدفئة ممكن نقول يكتر خيركن...

معلومات إضافية

العدد رقم:
1102
آخر تعديل على الإثنين, 26 كانون1/ديسمبر 2022 08:05