خبر عام وتعليق هام

الخبر يقول: «كشف وزير التجارة الداخلية وحماية المستهلك أنه ببداية الأسبوع الجاري، أي بتاريخ 6 الشهر ستكون هناك دورة جديدة لتوزيع السكر والرز المدعومين وبكميات كافية، بعدما يكون انتهى توزيع الدورة السابقة للجميع، ومسألة ارتفاع الأسعار هي لعبة التجار».
التعليق: على أساس التجار عم تلعب لحالا ومن راسا وأنتو مالكون سلطة عليهون ولا عم تدعموهن!! بكل الأحوال كتير من العيل ما حصلت ع مخصصاتها، أو عم يتم تقليص مخصصاتها بما إنو الكميات كافية للجميع..
الخبر يقول: «أكد رئيس الجمعية الحرفية لصناعة الألبان والأجبان ومشتقاتها، أنه من المفترض صدور نشرة أسعار جديدة خلال أيام، متوقعاً أن يُسعّر فيها كيلو اللبن الرائب (علبة من دون غطاء) بـ1200ليرة، وكيلو اللبن المصفى بـ 7500 ليرة، وكيلو الجبنة البلدية 10 آلاف ليرة».
التعليق: شكلو رئيس الجمعية ما بيفوت اللبنة والجبنة ع بيتو لحتى ما بيعرف أنو سعرها طاحش عن هالنشرة بكتير... بس يا ترى برأيو هالأسعار بتتناسب مع الأجور يلي بياخدها المواطن؟
الخبر يقول: «قال عضو لجنة تجار ومصدري الخضار والفواكه في دمشق: إن أمطار الأسبوع الماضي أثرت على أسعار الخضار والفواكه بشكل سريع، حيث ارتفعت الأسعار من 200 إلى 500 ليرة في أول ساعة مطر».
التعليق: أول تعقيب إنو الأسعار ارتفعت أكتر من 500 ليرة... تاني تعقيب شالوها من حضن التجار وحطوها بحضن الفيضان والسيول يلي صارت... يلا يا شباب خلونا نصلي صلاة «ما بدنا استسقاء» كرمال ما ترتفع الأسعار...
الخبر يقول: «وزير التجارة الداخلية وحماية المستهلك يصدر قراراً يحدد فيه أسعار الغاز المباعة عن طريق البطاقة الإلكترونية، المنزلي 10كغ بـ 9700 ليرة والصناعي 16 كغ بـ 40000 ليرة».
التعليق: أكل المواطن بشكل مرتب هل المقلب المنتظر... سيدي وزير إبادة المستهلك شو رأيك تعتبر هل الشعب- شعب شقيق مو شعب سوري وتصير تعطيه حقوقه من الغاز بشكل رمزي متلو متل غيرو؟