كيف تقنن الكهربا من دون كهربا!!!

قال وزير الكهرباء: «لو قامت كل عائلة باستخدام حصتها من الكهرباء بإدراك لتم إلغاء التقنين».
ومن هون فيكون تعرفوا كيف فللنا يلي شافطة كهربا البلد كلو وما لنا عرفانين نستخدما بإدراك!!
ولك يا سيادة الوزير هنن هل التلفزيون أبو الشاشة أبو 12 فولط والبراد والغسالة...
لا يا ربي منشان الكذب... الغسالة صفيانة منظر لأنو وجبة الغسيل ممكن تضل لحوالي يومين ... لهيك التغت من قاموسنا سياسة الغسيل ورجعنا لأيام التعتير وصرنا نغسل ع أيدينا...
أما يا سمح الله يا سيادتك إنو عم نشغل القاظان لنتحمم.... فبحب خبرك إنو العالم عم تعمل تباعد اجتماعي مُلزم لأن ما حدا عندو مي سخنة للحمام...
أما بالنسبة للراوتر... فبحب خبرك ما عم نشغلو وعم نفكر نلغي اشتراكنا ونروح من خزينة الاتصالات... لأنو الإنترنت أبطأ من السلحفة الله وكيلك...
صح... أبقوا جيبولنا الكهربا متل العالم والخلق منشان نعرف ع الأقلية نتعلم كيف ندركو لهاد الاختراع يلي اسمو الكهربا...
شو بدكون بالحكي؟؟؟ مُبذرين نحن... لك يا أخي مو بإيدنا... قسماً بالله لولاك ولولا تدابيرك وتقنينك كنا حتى هل الساعة ونص من الـ24 ساعة ما كنا شفناها... فضلك ما رح ننساه!!!!
وقال سيادتو كمان «علماً أن استهلاك الكهرباء في أية دولة في العالم المتحضر للعائلة لا يتجاوز «15 كيلو واطاً» من الكهرباء يومياً...»
بس سيادتو شكلو بعالم تاني غير عالمنا وواقعنا يلي عايشين فيه...
لسا كلما دق الكوز بالجرة بيقولوا دولة متحضرة!!!
ولك يا سيادتك وقت بدك تعمل مقارنة بين بلدنا المتخلف وبين بلد تاني متحضر... بس تذكر مين يلي خلا سورية- متخلفة- شبيهة العصور الحجرية!!!
بلد فيها كلشي وخيراتا بتغرق أهلا والعالم... ومتخلفة بحتة بكل ما تحمله الكلمة من معنى... ليش؟؟
معروف الجواب.... هاد باب رزقكون بالمختصر...
ورجع سيادتو قال: سبب التقنيين اليوم لـ «ضعف توافر المواد الأولية من غاز منزلي ومازوت، ما أدى إلى اعتماد الكثير من المواطنين على الطاقة الكهربائية، وشكل حالة من الاستهلاك التي تزيد على المتوافر».
تعقيباً ع هل الكلام... هل تعلم إنو حلمنا نحن الناس يلي عايشين بالمناطق العادية يلي مالها مخدمة كما يجب إنو نشوف الكهربا لأنو ما عنا كهربا لا للدفا ولا للطبخ ولا حتى للحمام؟؟
والله شكلك لا تعلم....
واعتبر سيادتو أن «وضع الكهرباء بشكل عام أفضل، وخلال الأيام القليلة القادمة سوف نشهد تحسّناً في واقع تقنين التيار الكهربائي...»
ومن هون فينا نعتبر إنو رح تصير عنجد الكهربا من المنسيات وحلم لكل حدا عايش ع الأراضي السورية...
لأنو ضمنياً بعد كل تصريح من سيادتو من هل النوع هاد منشهد بعدا تحسناً بالقطع الزايد للكهربا....
بصراحة ومن الآخر... الموضوع مالو متل ما عم يتم التصريح عنو قصة نقص فيول أو غاز أو صيانة وهدول الحجج والذرائع تبعون...
الموضوع هو عبارة عن خنق زايد ليملو جيبون أكتر ويحطو بعدا الحق ع هل المشحر الغلبان يلي اسمو «مواطن»...
ومالو جديد عليهون... بس الجديد هو إنو أول حكومة بتحط الحق دائماً وأبداً على شعبها...
وربي من عالي سماه يكون بعونوا لهل الشعب ع قد بس ما عم يتحمل...