شو يعني «توافق»؟

وحدة من القصص يلي لساتها حاضرة وموجودة هي التصلب بالرأي، ومعاداة أي حدا عندو رأي غير الرأي تبعي. هي نتيجة طبيعية لطريقة الحياة السابقة تحت حكم الحزب الواحد، لإنو يلي كان عندو رأي تاني غير رأي السلطة، ما كان مستعد يتفق مع حدا ولا يتوافق مع حدا، لإنو ببساطة عندو إحساس إنو رأيه هو موقف أخلاقي مو موقف عملي قابل للتطبيق، ولما يكون الرأي حكم أخلاقي مو مسألة عملية، بكون ما في داعي الواحد يسمع الآخرين، ولا في داعي يعدل موقفه.
اليوم، ومع إنو سقطت السلطة، لسا في كتير سوريين وأحزاب وقوى سورية عم تتعامل مع بعضها بالطريقة نفسها، إنو رأيها هو الصح وكل رأي تاني غلط، يا بتحكي متل ما بحكي أنا بالضبط، يا أما أنت غلط.
اليوم، نحنا بحاجة نتعلم على فن جديد ما كان متاح سابقاً: فن التوافق، ويلي معناتو إنو لازم قبل كل شي نكون مقتنعين إنو ما حدا منا عنده الحقيقة كاملة، ولازم نحاول إنو نجمع آراءنا ونطلع برأي جديد منها، يعني مو يا أنا يا أنت، لازم نكون أنا وأنت. ولما يكون في رأي أول ورأي تاني، لازم نتعلم كيف نطلع برأي تالت يجمع الرأيين، ويكون أصح منهون وأنضج وأعمق... هاد بالضبط هو التوافق!