«إي... كول بعقلنا حلاوة!»

المستر نفسو هو يلي استلم الاقتصاد من سنة 2005 لـ2010، وعمل البلد جنة... جنة نظامي، بس لصحاب العملة مو لأهل البلد... بـ2005 كانت نسبة الفقر 30% بـ2010 صارت 44%، بس مشان ما نظلموا، ما بينحكى فيهون، شو يعني 14% فرق؟ شغلة 3 ملايين بني آدم وكسور، كانوا فوق خط الفقر، ونزلوا تحت خط الفقر... بسيطة ما بينحكى فيها.
خلال الفترة نفسها، ارتفعت أسعار المازوت من 7 ليرات لـ25 ليرة لليتر، وولعت الأسعار تبع كل شي، من النقل للزراعة للصناعة، وتراجع الإنتاج الزراعي بنسبة 30%،،، وصرنا نشوف بالشام أهل الجزيرة السورية يلي أرضهن أكرم وأخصب أرض قاعدين تحت الجسور عم يدوروا على شغل بالمياومة... بس هاد كلو طبيعي، حاكم هدول تبع «اقتصاد السوق الحر والاجتماعي»، جماعة البنك الدولي يعني، شعارهون الأساسي هو «السياحة والتجارة قاطرة النمو»، الزراعة والصناعة حكي فاضي... طبعاً هي شعاراتون ببلداننا مو ببلدانهون، بلدانهون بالعكس أهم شي الصناعة والزراعة...

مالكون بالطويلة، المستر عبد الله الدردري يلي حالياً نائب الأمين العام للأمم المتحدة، عم يجهز حالو يرجعلنا من جديد، ليكمل مسيرة «التطوير والتحديث» تبع بشار الأسد... شو رأيكن؟ مو في ناس كتير عم تقول لازم نمنع فلول النظام... هادا بالذات مو فلول نظام، هاد النظام بحد ذاته، ومن عظام الرقبة، لإنو بالأخير شو يعني نظام؟ يعني شغل الناس وتعبها لجيبة مين بروح بالأخير، لجيوبها، ولا لجيوب الحرامية...؟؟