وجع ع ورق
قال في ناس محتفلة بعيد الميلاد وراس السنة.. قولكم شو مشانا؟ معقول يخطر ببال المسلحين يللي حابسينا جوات مناطقنا بحجة أنهم عم يقاتلوا النظام أو ببال حواجز النظام يللي مسكرين علينا الطلعة هنن كمان وهالكينا بالقصف كل يوم والتاني بحجة أنهم عم يضيقوا ع المسلحين.. معقول يخطر ببالهم أنو يحلحلوها علينا شوي ويخلونا ناخد نفس.. بس نفس.. أو يخلونا ندفن أمواتنا بهدوء.. والله هيك كتير.. طولت الحالة بقا..!جاية عبالي زور قرايبيني بالمدينة واتطمن عليهم هنن كمان.. ما وضعهم متل وضعنا مع المفخخات والهاونات..!
*****
الكفرة الملحدين منكم يللي ما بدهم يقيموا حدود الله بدنا نخلص منهم.. دبح يا أنجاس.. لوين بدكم تطلعوا لعند الكفار والمشركين ويللي فيهم ناس بيسموا حالهم مسلمين والدين منهم براء..ويللي عم يزينوا شوارعهم وينصبوا الأشجار المزينة ويقيموا حفلات مختلطة والعياذ بالله بما يلهي عن طاعته برعاية النظام وزبانيته.. وقال شو هنن أحرار..! نحنا أولياء الله ويللي ما بيعجبوا حدو السيف.. وخليه يموت يللي يموت.. ومالو..!
*****
الإرهابيين الوهابيين السفلة قال بدهم حرية.. أيا حرية يا (عر..ـات).. ليش أنتو بتعرفوها يا دبيحة؟ والله لازمكم حرق وإبادة أنتو وأهلكم وجيرانكم وبيئاتكم الحاضنة.. ومو مشكلة بكرا قيادتنا وحكومتنا بترجع بتعمر البلد! المعركة وجودية مع قطعانكم يللي جايين من أقصاها إلى أقصاها.. ومع مؤامراتكم وأسيادكم.. وخليه يضل 10 مليون بسورية.. بس يكونوا سوريين عنجد.. قديش صرلنا تلات سنين؟ خليهم عشرة.. مو مشكلة جيشنا البطل بالمرصاد..!
******
آخ.. على ها الزمن..؟ أخي أنا كنت بني آدم طبيعي.. بحياتي ما حملت سلاح إلا لما انقتل أخي قدامي..! قالولك يعني أنا مبسوط هلأ؟ أهلي ورفقاتي عم يموتوا واحد قفا التاني..! وتلت سنين وهدنك بيقولولنا أصبروا جمعة تانية لح يسقط النظام..! وعلقنا وما عاد نعرف نخلص، لا عاد قدران ترك السلاح ولا عاد قدران قاتل، وصفيان بين نارين، النظام من جهة والنصرة ويللي متلها من جهة تانية.. مين كان بيعرف إنو الأمور رح توصل لهون.. شو بدي ساوي هلأ؟؟
******
يا ترى شو بتكون خطيبتي عم تعمل هلأ.. وكيفن أهلي..؟ بعدو هالختيار عم يصيح ع الختيارة لأنو ما حطتلوا مي مع الأكل؟ داق خلقي.. يا ريت فيني آخد إجازة ع راس السنة بركي بتطمن عليهم.. والله اشتقتلهم..! يا من تراني فايت بمعركة مع الأوباش ونافد منها بالزور..ورفقاتي عم يروحوا قدامي..! ولما معلمي بيريحني بنزرع ع شي حاجز من الصبح لآخر الليل لحتى تبسمر رجليي.. لك بدي اتحمم متل العالم والناس..! بالمعركة بتشوف واحد بتقدر أنو سوري ما لازم تقتلوا بس بتشوف جنبوا تنين تلاتة ما بتعرف قرعة أبوهم من وين..! وع الحاجز بتشوف نظرات تململ بعيون ناس مو مسترجاية تحكي.. بس صرنا بنعرف مين بيتبسلمك عنجد ومين لاء..! لك وبعدين.. بعدين بسما ها الحالة؟
