بـ 100 ألف ليرة...حريرات لتكمّل الحياة

أبو أحمد كم حريرة عم تحصِّل باليوم؟
- شو كم حريرة! والله ما بعرف، ليش عم تسأل؟
هاد يا سيدي قال البني آدم بيحتاج 2400حريرة كل يوم، حتى يضل عايش بصحة منيحة...
- شو حبيبي، من وين جايبها هي! انشالله من (المسنكحات) اللي بيطلعو عالتلفزيون وبيحكولنا بدك تاكل هيك، وما تاكل هيك!
لا.. لا، هاد حكي شغيلة سوريين. بزماناتها نقابات العمال بأزمة التمانينات، قالولن للحكومة، إنو الشغيل السوري حتى فيه يكمّل شغل، بدو باليوم يتغذى بـ 2400 حريرة.
- وكيف مقسمة هالحريرات بالله لنشوف شو عم يطلعلنا منها؟
هات لاحسبلك اياهن مع كلفتن بالشهر... أول شي مكترين الخبزات، يعني حاطين إنو بني آدم سوري عادي بياكل نص ربطة خبز باليوم، يعني بدك بالشهر 750 ليرة خبز، بسعر الربطة من الفرن خمسين ليرة.
- إي بسيطة.
وين بسيطة! دقيقة لكملك...
بدك 70غرام رز باليوم يعني بالشهر 2100غرام، سعرن 1200 ليرة... يعني إذا نوّعتن بين برغل ورز وفاصوليا وعدس مو كتير بتفرق الكلفة.
- واللحمة؟
جاييك بالحكي، بدك لحمة باليوم شي 75 غرام، يعني أقل من وزن فخدة جاج... بس وين الفيلم؟ إنّو هدول بالشهر كيلين وربع لحمة إلك لحالك، ولازم يكونو: جاج ولحمة حمرا، عجل وغنم. يعني بيطلعو بالشهر 5610 ليرة، مصروف لحمة ضروري للبني آدم، لسّا بسيطة؟
- كمل كمل أخي!
عندك البيض، لازمك بيضة باليوم يعني 1500 ليرة بالشهر، وجبنة 25 غرام يعني 960 ليرة بس.
ولازم تعملك كل يوم صحن سلطة أبو 250غرام بيكلفك بالشهر 2700 ليرة.
- خلصت؟
وين خلصت، شو ما بتاكلوا فواكه بالبيت؟
- مبلا مناكل، أديش هدول كمان؟
حسب الدراسة يا سيدي بتحتاج 82 غرام باليوم، يعني بالشهر بيطلع حقون 2460 ليرة... وشوية سكريات من قريبو، لتحسن توقف على رجليك بين سكر وحلاوة بكلفوك 4710 ليرة كمان بالشهر، وهاد ما حسبتلك الزيت والشاي والقهوة...
يعني بيطلع معنا بالشهر بدك أكل بس: 19700 ليرة، يعني احسبن 20 ألف ليرة.
- يا حبيبي بس نحنا بالبيت 5 نفوس!
إي بسيطة معلم ضربن بـ 5، بيطلع بدكن 100 ألف ليرة سورية أكل فقط لا غير.
- 100ألف أكل، مو كأنك عم تبالغ شوي أخي؟
عم بالغ! تعال شوف شو بياكلو العالم...
عندك الأميركاني بياخدلو باليوم 3700 حريرة، الفرنسي 3500 حريرة، لك الصيني، مو تشوفو صغير ونحيف بياخدلو باليوم 3100 حريرة، حتى الدراويش بإفريقيا بيطلعلو الواحد وسطياً 2600 حريرة باليوم. وحسب حكين الجماعة اللي حاسبين الحسبة إنو بالعالم وسطياً البني آدم بيستهلك 2870 حريرة.
يعني أقل حصة من بيناتن أكتر من اللي عم احسبلك اياهن بـ 200 حريرة!
- طيب يا سيدي و إذا ما حصّلتن شو رح تخرب الدنيا؟
لا مو الدنيا، إنت يلي رح تخرب والله، من شي قليل مو مخلي مرض يعتب عليك؟ شوف شو كاتبين عن ضرر نقص السعرات الحرارية: قلة نوم، تعب دائم، أمراض قلب، أمراض كلى، نقص مناعة، التهابات وغيرو وغيراتو.
- أخي ويلي بجبلك هالـ2400 بدون ولا غرام لحمة؟
يعني فيك تاكل بدال اللحمة فول وبطاطا، بس والله مو طالع من قلبي قلك، تعا شوف شو بيعمل نقص البروتين الحيواني: ضمور عضلات، ضعف مناعة، فقر دم، ضعف عظام...
- بس بس حاجة تكمل أنا معي تلت رباع هالأمراض هي.
لك إي عم حاكيك، يعني إنت لما تروح عالشغل بدل ما تصرف طاقة من هالأكل المفروض إنك تاخدو، عم تصرف من صحتك. أكتر من هيك الشغل اللي عم تشتغلو، بيسموها (قوة العمل) اللي عم تصرفا... هي عم تاخدا عحساب عمرك!
- إي كل السوريين هيك، إلا الأكابر من اللي بياكلو سمك بالمطاعم مو طون...
إي صح... كل السوريين هيك، وكل السوريين نقص عمرن: بتقلك الأمم المتحدة إنو البني آدم السوري كان يعيش 70 سنة وسطياً بالـ 2010، صار يعيش 66 سنة بالـ 2016، يعني خسر من عمرو أربع سنين، بست سنين!
- يا لطيف... طيب وإذا راتبي وراتب مرتي ما بيطلعوا 85 ألف بالشهر، ومع شغلي المسا، والولاد إذا حاصوا واشتغلولن شي شغلة... لك ما منوصل للـ 200 ألف بالشهر! بدي اصرف منن 100 ألف ليرة أكل؟ إي والأجار واللبس والمكاري والمدارس والدكاترة... شو الحل يعني؟
بدك تاخد أكلاتك من اللي عم ياكلو حصتك وحصة غيرك، منشان فيك تكمل تعيش... ما في حل غير هيك.

×3
تحتاج الأسرة السورية إلى ثلاثة أجور وسطية تقريباً لتغطي تكاليف الغذاء والمشروبات الضرورية، وتؤمن لكل فرد منها يومياً2400 حريرة منوعة.

-4،5
خسر السوريون أربع سنوات ونصف من أعمارهم الوسطية خلال ست سنوات، فبينما كان السوري يعيش وسطياً 70،7 سنة، أصبح يعيش 66،3 سنة.