المعلم «عبودة» وفسالسيد «أبو السوس» .. بجلسة خاصة وشاعرية!!

- المعلم عبوده: إي نعم شفت، بدك تعمل إذن من طين وإذن من عجين. هدول الشيوعيين حسوديين وعينهم ضيقه، وما بيتركوا حدا بحالو «رزقة والله بعتها منرفضها»؟ شو بدك فيهم، خلينا بشغلنا، حاكم الواحد منا ما بيعرف إيمتى بيخلصو ميّاته من هل الموقع، من شان هيك لازم نغب قد ما بنقدر وبأسرع ما يمكن.

- السيد أبو السوس: بس الموضوع مثار بطريقة بتخوف! مو لازم نحسب حساب الناس ورئيس الحكومة والأمن والقيادة و... يعني لو أثير الموضوع بغير دولة كانت قامت الدينا وما قعدت.

- المعلم عبوده: ضحكتني.. شو ماحلك تفهم التركيبة؟ سعينا لك بها الموقع وما شاء الله عنك ماشي مثل الساعة، بقى لا تنزعها بخوفك اللي مالو مبرر.

اليوم مافي حدا بيحاسب حدا، والشعب إلو الله، وهيك الله رايد.. شو منعارض حكمته؟ بهل البلد مافي حدا يحاسب على شي، وشو ما كانت النتيجة تكون، ونحن بموضوعنا لا منقول إيه ولا لاء، وبهيك الأمور بتمشي متل الصلاة على النبي، وأسوأ شي ممكن يصير إنهم يمشوك لبيتك، لكن بتكون أمنت حالك لولد الولد، ومع هذا ياأبو السوس، من باب الاحتياط لأي شي لا عالبال ولا عالخاطر، لازم يكون عنا رد (على ما ورد بالجريدة). الناس سهل إقناعهم، بس لازم تشوفوا شركة دبلن حتى تساعدنا بالحبكة.

- أبو السوس: أنا تلميذك يامعلم! نحن جهزنا الرد أنا ومجموعة موظفين عندي بالشركة السورية للنفط، لكن بالبداية راح نحاول نطنش قدر الإمكان وهذا الأسلم، بس إذا كان لابد من الرد، فنحنا جاهزين، وشوف شو جهزنا:

بالنسبة لشركة دبلن قدمت مساعدة لمحافظة الحسكة مبلغ محرز، وراح تقدم قريباً ميزانية ضخمة لسنة 2009، صحيح ماراح تتنفذ لكن مليحة حتى نفرجي قديش الأمور كويسة وقديش عم نجيب استثمارات للدولة، ومنظهرها بحجم التنمية. الموضوع بيبهر وما حدا راح ينتبه بأنو الموضوع من دهنه سقّيلو.

أما بالنسبة للشركة الصينية: بلشنا نعرف بأن الشركة عملاقة والصينيين أصدقائنا، صحيح هالشغلة مالا علاقة بالموضوع المذكور. بس لازم نحشرهم من شان يظهر الموضوع على أنه دولي، وهيك هيك الصينيين مستقلين.

ولعلمك نحن باركنا لهم ومن شان هيك أعلنو بتاريخ 1/11/2008 البدء بشراء كافة الأسهم من دبلن وبأسعار ممتازة.

بما يتعلق بالبيع، فنحن نحاول قدر الإمكان تجاهل هذه المسألة لأنها خارجية، وتمت بين شركتين أجنبيتين، حتى ولو كانت هذه البيعه لجزء مهم من ثروتنا، لكن مابدنا نزعّل حدا منا، وبشكل خاص الصينيين، ولذلك راح نتجاهل المادتين 20 و21 من العقد. أما المليارين اللي كسبوهن جماعة دبلن من البيعه ولو كانت من المتاجرة بثروات شعبنا لكن يا أخي هيك العقد بقول، «الله يرزقهم وما بجوز الحسد». أما ما ورد بخصوص الاحتياطي: فنحن نؤكد وجود هذا الاحتياطي الكبير، وسوف نفرح ونغني ونرقص إذا لزم الأمر (هذا الاحتياطي اكتشف بعهدنا).

والمؤكد إنو الناس نسيت تصريحاتنا السابقة أنا وأنت أثناء حملتنا لرفع الدعم عن مادة المازوت بإنو النفط بسوريا رح ينضب بين عامي 2012 و2015 على أبعد تقدير.. وبخصوص الحقلين: (الشيخ سليمان، وجريبي)، فالشباب عندي بالسورية للنفط عم يقولوا بأنه صحيح لم يعلن عن هذين الحقلين لكن «دحشناهم» بالخريطة الطبوغرافية الملحقة بالعقد، وهادا للصالح الوطني، وهادا كلنا عم نعمل من شانو.. كتير عجبتني فكرة الصالح الوطني.

نحنا بنمنح أي امتياز بطريقتنا، يعني من الممكن إنو تحصل شركة على امتياز نفط ضمن الطبقات العميقة مثل عقد شركة غولف سانس في بعض المناطق والحقول، والعقد الجديد مع شركة شل للطبقات العميقة بحقولها السابقة، وفي شركات على امتياز نفط بالطبقات العليا مثل شركة دبلن، لكن فرق كبير بين الجيولوجيا والطبوغرافيا. ونحن وقت اللي بدنا ندحش مندحش!! وخاصة إذا كان للصالح الوطني. وبما يتعلق بالسرقات من خلال التوريدات والعقود اللي بتقوم فيها شركة دبلن، فنحنا بنحسم عليهم أموال (وبأرقام جيدة). وما يتعلق بنسبة المي بالنفط رح نحقق بالموضوع، بعد أن تكون شركة دبلن قد غادرت مصحوبة بالسلامة.

وأخيراً: إذا لزم الأمر بنضحي باسم واحد من الشركة السورية للنفط، ومنخرب بيوتهم وبيوت أهاليهم، ومنجعلهم عنوان للفساد، ومنفرجي الناس حرصنا على الوطن والمواطن والمال العام.. بقى شو رأيك بهالجاهزية يا معلم.

- المعلم عبوده: الحقيقة 10 على 10 برافو. ومثل ما نفد موضوع شركة النور والمصفاية بينفد هذا الموضوع.

ودامت لنا سوريا غالية!!!