خبر عام وتعليق هام... التخاصص على المقاسم في باسيليا سيتي!

تعليق: يعني كتر خير المحافظ مشان التوجيه بتسهيل أمور المواطنين... بس ياترى أديش عدد المواطنين المشحرين اللي ح يستفيدو من هالمشروع النخبوي... فمشروع باسيليا سيتي متل ما روتا سيتي بالنتيجة ح يكون لمصلحة أصحاب الثروة وبس... يعني التخاصص اللي عم يصير هلأ ما ح يستفيد منو إلا المالكين الكبار... أما الصغار فعوضهم ع الله ح يضطرو للبيع...!

يقول الخبر: ناقش الاجتماع الذي عقد بتاريخ 11/9/2024 في وزارة الزراعة برئاسة وزير الزراعة معيقات العملية التصديرية للمنتجات الزراعية ومقترحات حلها.
تعليق: واووووو.. لك إذا وزير الزراعة لسا عم يناقش معيقات تصدير المنتجات الزراعية... معناتها إيمت ح تنحل هالمشكلة المزمنة؟ ولا هاد تمهيد قبل موسم الحمضيات مشان رفع العتب؟!

يقول الخبر: مديرة مكتب الزيتون: تحسن بإنتاج زيت الزيتون 6% عن العام الماضي، والأصناف السورية أثبتت قدرتها على تحمل التغيرات المناخية، ونتمنى أن يستطيع المواطن السوري الاستهلاك!
تعليق: يعني بالمختصر المفيد و ع الرغم من تحسن إنتاج الزيت بس المواطن ما ح يكون قادر ع الاستهلاك... وع الأغلب ح تكون النتيجة زيادة حصة التصدير.. وهيك وكل بساطة بتكون القصة محسومة لمصلحة المصدرين ع حساب المزارعين والمواطنين كالعادة!!

يقول الخبر: كشفت مصادر خاصة في وزارة النفط لـ «داما بوست» عن بدء شركة «البوابة الذهبية» باستقبال طلبات التزود بالمشتقات النفطية (بنزين، غاز، مازوت) لأصحاب الفعاليات الاقتصادية والصناعية والحرفية والسياحية، وللأشخاص المنتسبين إلى النقابات والاتحادات الحرفية أيضاً.
تعليق: يعني بكل وضوح الخصخصة شغالة ع قطاع توريد وتسويق وبيع المشتقات النفطية... واللي بطلع العين انو قصة الكميات بالنسبة للشركة مو مشكلة أبداً وهي قادرة على تأمينها لكل الجهات وللأفراد كمان... يعني بدهم يفهمونا أنو الشركة الخاصة طلعت أقدر من الحكومة ومن وزارة النفط ومن شركة محروقات مجتمعين مشان تبرير زيادة الخصخصة... مو هيك؟!

يقول الخبر: مدير المؤسسة العامة للمطبوعات: تم طباعة 13 مليون و700 ألف كتاب لمرحلة التعليم الأساسي بقيمة تصل لـ150 مليار ليرة، إضافة إلى3 ملايين كتاب لمرحلة الثانوية، وبلغت نسبة تدوير الكتب هذا العام 50%.
تعليق: والله كمية كبيرة من المطبوعات... ومبالغ مرقومة انصرفت عليها... بس معقول نسبة التدوير بعد هالكميات والمبالغ تكون 50%... لك لازم تكون أقل من هيك... علماً انو الوقائع بالمدارس بتقول انو نسبة التدوير أعلى... علماً أنو لسا في كتير طلاب ما استلمو كل كتبهم لهلأ... واللي استلم كان المستعمل شبه التالف أكتر من الجديد... عجبي!!