خبر عام وتعليق هام.. وضع المجموعة الأولى في المحطة الحرارية بحلب بالخدمة بطاقة إنتاجية تبلغ 202 ميغا واط

تعليق: لك ما شفنا نتائج تحسن وقت دخلت المجموعة الخامسة بالخدمة.. وأكيد ما ح نلمس نتائج بدخول المجموعة الأولى ع الخدمة هلأ.. يعني 400 ميغا بالنسبة النا متل قلتهم.. ساعات الوصل والقطع ع حالها.. والتبريرات ع حالها.. بكل الأحوال خبر متلو متل غيرو.. لا بيقدم ولا بيأخر..

يقول الخبر: وزارة النفط والثروة المعدنية: زيادة الكمية المتاحة للتعبئة من مادة البنزين أوكتان 95 للآليات المستحقة إلى 40 لتراً كل 5 أيام بدلاً من 35 لتراً أسبوعياً، وذلك اعتباراً من 5/10/2023.
تعليق: وهيك منشوف انو وزارة النفط عم تعمل اللي عليها لأصحاب السيارات اللي بيستهلكو الأوكتان 95.. طيب شو مشان الأوكتان 90.. وشو مشان مازوت التدفئة.. وشو مشان الغاز المنزلي.. مو كل هاد من مسؤولية وزارة النفط.. فعلاً تمييز وتحيز وفرز طبقي ولا أكبر من هيك.. وعلني كمان..

يقول الخبر: لفت مصدر في محافظة دمشق إلى أن عدداً كبيراً من العائلات لم تحصل بعد على مخصصاتها من مازوت التدفئة، مضيفاً: أن هناك أولوية لغير الحاصلين على المادة خلال موسم الشتاء الماضي، واصفاً التوزيع بالخجول.
تعليق: فعلاً التوزيع أكتر من خجول.. بس المصيبة انو هاد الخجل مستمر من سنة للتانية بدون أي نتائج ملموسة، والمخصصات عم تتاكل على عينك يا تاجر بدون تعويض.. طيب يعني ممكن الخجل يسد محل المازوت للتدفئة؟!

يقول الخبر: من تقرير أعمال هيئة الإشراف على التأمين عن نصف السنة من العام الحالي، بلغ إجمالي الأقساط التي حققتها جميع الشركات في كافة فروع التأمين حوالي /112/ مليار ل. س بنمو 67% عن نفس الفترة من العام السابق، وقابل هذا النمو أيضاً، نمواً بالتعويضات المسددة بنسبة 71% عن إجمالي التعويضات المُسددة في نفس الفترة المقابلة من عام 2022، ليصل حجم ما سُدد من تعويضات إلى حوالي /69/ مليار ل. س مُشكلاً ما نسبته 61% من حجم الأقساط.
تعليق: يعني بكل بساطة ووضوح شركات التأمين عم تحقق معدلات نمو ومرابح مليارية سنوية ع حساب المؤمن عليهم، وتحديداً من منتجين تأمينين أساسيين. الأول: هو التأمين الإلزامي ع السيارات. والتاني: التأمين الصحي للعاملين بالدولة.. وهيك منعرف شو يعني الأرباح السهلة والمضمونة والسريعة!

يقول الخبر: اعتبر عضو غرفة تجارة دمشق ياسر اكريم، أن الفوضى السعرية ما زالت سيدة الموقف، جراء ارتفاع حوامل الطاقة المستمر، إضافة إلى موضوع ضعف الخطط الاقتصادية، وانتهاج سياسات خاطئة في صنع القرار بعيداً عن التشاركية، ما أدّى بدوره لتراكمية في ارتفاع سعر الصرف.
تعليق: الحكي عن ارتفاع أسعار حوامل الطاقة جزء من الحقيقة طبعاً.. أما بخصوص الفوضى السعرية، فما ممكن تحييد دور التجار فيه.. وخاصة كبار الحيتان المسيطرين ع الأسواق، وع سعر الصرف بالسوق الموازي.. بس يمكن عبارة السياسات الخاطئة مو بمحلها هون.. لأن السياسات قطعت الأخطاء بأشواط، وصارت ظالمة ومجحفة، ووصلت إلى درجة التوحش من زمان..

يقول الخبر: أكد مصدر في وزارة التموين، أن الأسعار ستنخفض خلال مدة تقارب عشرة أيام وسيلمس المواطن هذا الانخفاض.
تعليق: هالحكي سمعنا منو كتيييير من زمان.. وكل مرة بتطلع النتيجة زيادة بالأسعار، وبنسب أعلى من قبلها.. والمواطن نسي شي اسمو انخفاض بالأسعار أصلاً.. لأن الملموس دائماً هو الزيادات السعرية اللي بتطلع من جيبتو وع حساب حياتو..