«إن لم تستحِ فقل ما شئت»

ومن يلي ذكر أعلاه منتأكد إنو شغلة الوزارات عنا ووزرائنا صف الكلمات ورا بعضها.. حتى ولو ما كانت مناسبة أو مفهومة...
بس يلي محيرنا كشعب إنو وزير التجارة الداخلية ع سبيل المثال أخصائي تغذية لحتى عم يقرر من عندو شو نوع الغذاء متل ما وصفه بالـ «قوت» وشو اللي مالو «قوت» للشعب؟؟؟
طيب بما إنو هيك صار الحكي كلنا ح نشتغل أخصائيي تغذية... وما حدا أحسن من حدا..
عزيزي سيادة الوزير تحية طيبة وبعد...
مالا تعرفه عن فوائد الموز والأرز الطويل... يجب علينا كشعب أن نعرفك بها...
«فوائد الموز عديدة، حيث يعد من أفضل المصادر الطبيعية للطاقة والسكريات البسيطة والمعادن المهمة لجسم الإنسان، وهي تشمل: غناه بالسعرات الحرارية ويمدنا بالطاقة، ويعد عامل الوقاية من المشاكل الهضمية ومن الإمساك، وتقوية جهاز المناعة، ويحافظ على القلب ويحسن من الحالة النفسية، وأخيراً والأهم، أنه غني بالمعادن»..
أما بالنسبة لفوائد الرز الطويل فلك بعضاً منها...
«يحمل الأرز فوائد صحية عديدة، فهو يحتوي على 20% من الألياف، حيث يحتوي على كربوهيدرات وبروتين ودهون أقل وألياف وفيتامينات ومعادن هامة للجسم، كما يحتوي على ثماني أحماض آمينية أساسية، كما أنه غني بفيتامين (ب) وذو قيمة عالية جداً في عملية التمثيل الغذائي»..
وبهل المادتين الغذائيات يلي بنظرك مو قوت للشعب منلاحظ إنهم بقيمة غذائية عالية.. وبيعملو حماية القلب.. يلي عم تسعوا جاهدين لتوقفولنا نبضاتو بارتفاع الأسعار الفلاجية، يلي كل يوم عم تزيد أكتر من اليوم يلي قبلو...
والموز بالذات بيحسن من الحالة النفسية.. يلي بفضل جهودكن الجبارة عم تضل أسوأ من أسوأ شي مخلوق بهل الكون...
طبعاً، ما الهدف أنه نعرف المواطن ع فوائد هل المادتين وشو فيها من قيم غذائية... بس حبينا نخبر سيادة الوزير فيهن لأن شكلو ما عندو خبر.. متل عدم معرفتوا بشو عم يصير بالأسواق.. وكمية الاستغلال والنهب يلي عم تتمارس بحق الشعب ككل...
طيب هلأ ح نفترض مثلاً مثلاً إنو مالهن قوت للشعب... يعني ح نساير..
شو هي البدائل المتوفرة بالأسواق بأسعار مناسبة لهل الشعب المسحوق، بظل الاستغناء عن الغذاء.. يلي إذا ما قلنا انخفض استهلاكو بنسبة 90% حنقول بنسبة 80% بسبب الأسعار الكبيرة بالمقارنة مع الخرجية المتدنية يلي اسمها (أجور)؟؟
أما بالنسبة لانخفاض سعر البصل وملاحقة محتكريه....
فـ والله وتالله ويمين الله إنكن كسرتوا الشعب بهل القرار.... يعني بعد ما العالم قلبت مصرياتها بصل.. رح تخفضوا سعرو وتلاحقوا محتكريه؟؟؟
هل يجوز هذا شرعاً؟؟؟؟
بس لهلق ما انفهم سبب هل الارتفاع المذهل هاد للبصل؟؟؟
بس يمكن من واجبنا التذكير انو السنة الماضية سمحت الحكومة بتصدير البصل.. يعني استفاد كم حوت من هالعملية.. وهلأ ح يستوردوه كمان مشان ينتفع كم بلهموطي.. أما الناس فآخر همها للحكومة..
أما بالنسبة للشق الأخير، وهو منطقياً لازم تنخفض الأسعار 30%، فمتل ما خبرتكن هو بعيد كتير عن الأسواق والأسعار...
عزيزي الوزير: الأسعار بعد هل الكارثة يلي حلت علينا- ارتفعت أكتر من 30%...
يعني ع حكيك وسدقت هل المرة معنا إذا انخفضت 30% بتكونوا ربحانين 20% إذا مو أكتر حسب الأصناف، ونسبة ارتفاع سعرها...
فعلياً، الأسعار ما ح تنخفض، بالعكس ح تشد طلوع لفوق بعد ما ارتفع سعر المازوت الصناعي ولا نسيت؟؟؟!!!
فحاج ضحك ع اللحى.!!
ع أساس انتو عم تطاردو الأسعار والمحتكرين.. بس خلبي..
بالمقابل، صار لازم علينا نطارد النهب والفساد عملي.. لنقلع الشرش كلو..