خبر عام وتعليق هام..«أعلن وزير التجارة الداخلية وحماية المستهلك نيته تعديل المرسوم 8 وإلغاء مادة السجن من المرسوم بحق التجار»

تعليق: هون منشوف العمل الحكومي الحقيقي بحق المواطنين «المستهلكين» مو لمصلحتهم... وهون منتأكد من الشراكة والتشاركية بالعمل الحكومي مع التجار ولمصلحة حيتان البلد.. لأن وقت تبقى العقوبة ع فرض الغرامة بس فكلنا منعرف أنها ما ح تكون إلّا من جيبة المواطن كالعادة... يعني نحن شو استفدنا من هل الإعلان غير زيادة الطين بلة علينا؟؟

يقول الخبر: «لا تزال عادة الصيادلة بتغيير سعر الدواء -عبر شطب السعر القديم وكتابة سعر جديد على العلبة- سارية حتى الآن، في حين تتفاوت الأسعار لنفس الدواء من صيدلية لأخرى، وفقاً لما نقلته صحيفة تشرين المحلية».
تعليق: ع كل الأحوال الموضوع مو بس 500 ليرة متل ما انذكر، بعض الأدوية وصلت درجة اختلاف سعرها من صيدلية لصيدلية تانية لأكتر من 1000 ليرة، والأكسسوارات الطبية متل ما بيقولولها وصل الاختلاف لـ 4000 ليرة... والأدوية المهربة يلي منتشرة بالصيدليات وع الواجهات هيك من دون خوف من الرقابة، وصل اختلاف سعرها لعشرات الآلاف.. طيب صح وين الرقابة؟ وأي نوع من الشكوى يلي لازم نقدمه مثلاً.. ما دام دود الخل منو وفيه؟؟؟ مو ع أساس كلشي بالبلد ماشي ع الليبرة، وكلو عليه مراقبة؟؟ ولا كالعادة حبر ع ورق؟؟...

يقول الخبر: «أكد مدير عمليات أتمتة الغاز بوزارة النفط، أنه حالياً هناك تحسن جزئي بتوريدات الغاز، وهذا سينعكس على تخفيض مدة تسليم الأسطوانة».
تعليق: يعني منفهم إنو ح تقل «عدّة المطلقة» عن 100 يوم؟؟ يعني ممكن تصير 100 إلا يوم ولا شو؟؟ لك خيو صرلنا سنين عم ناخد إبر البنج، وما عم نستفاد بشي... وإذا تحسن الوضع فهل التحسن عم يكون جزئياً... أما بالنسبة للوزن والسعر ما في شي عم يتحسن فيهن، ولا حتى جزئياً...

يقول الخبر: «نفت وزارة التجارة الداخلية وحماية المستهلك، وجود أية دراسة لرفع سعر ربطة الخبز، حيث قالت: ليست هناك أية دراسة لرفع سعر ربطة الخبز، أو مجرد نية أو تفكير، وكل ما يشاع في بعض الوسائل الإعلامية حول ذلك هو محض تخيلات وإبداعات شخصية لا أساس لها من الصحة».
تعليق: نحن كمواطنين لازم نحاول نتفاءل بخمسة هل المرة... بس والله ما ح تزبط معنا... منعرفكن منيح كتير، وأكيد ما ظلمناكن، خصوصي بعد هالتلت سيناريوهات يلي طارحينن ع طاولتكن... إنو لقمة عيش المواطن الأساسية والمهمة عندو فاردينلها 3 سيناريوهات؟؟ هزُلت، لك وإذا بدكن كمان عيب عليكن... ع أساس كلو إلّا الخبز!!!