عنجد التدفئة بالـ «صمود»؟؟؟

وتمت هل المفاجأة السّارّة من خلال كشف وزارة النفط بتاريخ 12 أيلول الجاري عن بدء التسجيل على «مازوط» التدفئة لفصل الشتاء الحالي..
والدفعة الأولى.. والكل يركز ع كلمة دفعة والأولى- حتكون 50 لتر... والأولوية بالتنفيذ بعد التسجيل حتكون تبعاً للأقدم يا عيوني.. وبحيث رح ينفتح هل الباب أبو الـ 50 لتر بتاريخ 14 الشهر...
50 لتر يا جماعة الخير!!!
مو كتار ع كل عيلة؟؟
لك ليش البعزقة آآآآه؟؟
ولك وين الحفاظ على ثروات الوطن؟؟
وكيف هلق بدو يتعلم المواطن السوري كيفية الصمود والتعايش مع المآسي وإنتو عم تطمعوه بهل الـ 50 لتر كمان آآآه؟؟؟
ويلي بيخلينا نحكي هو موضوع الدفعة الأولى... يعني في دفعة تانية... يعني كأنو في نية لتفسيد أكتر لأخلاق المواطن...
لك تخيلو هدول بدهم سيرنك يتعبو فيهم مو طاسة تبع الـ 5 ليترات!!
وتخيلو معي كمان يا يرعاكم الله إنو عيلة تكون مكونة من عريس وعروس وبس.. ويحصلوا لا سمح الله ع 100 لتر خلال فصل واحد!!!
هدول مين عاد يهديهن بعد ما انتزعت أخلاقن... أأأه؟؟؟
ولا كيف عاد حيتعلموا الصمود... كمان أأأه؟؟
ويلي بيضحِك بالموضوع هو فكرة التسجيل والتقنين المُتبع...
لك إنترنت متل الخلق ما في... تغطية منشان باقة الموبايل كمان ما في.. بما إنو الأغلب ما عندو راوتر بالبيت بفضلكن.... لك وإن صار وحصل وتأمن الإنترنت وتم التسجيل، فالأغلب ما عم يحصل ع «مازوط» للتدفئة...
وهل العالم ما عم يتدفوا إلا ع الصمود والتصدي.. وطولة البال الله وكيلكم...
طيب مثلاً.. مثلاً.. مثلاً: يلي عم يدور ببالنا صح يا ترى أو ماذا؟؟؟
لأنو بعد التحليلات والتفسيرات للعمل الحكومي اللاجدّي وغير المُجدّي وغير النافع.. أيعقل يكون قصدن فعلاً أنو نعتمد بحياتنا كلها ع الصمود؟؟؟
فبما إنو دخلت مادة «مازوط» باب التقنين الحكومي بعد ما تخفضت الكمية المخصصة لكل عيلة من الـ 400 للـ 200 للـ 100 ليتر.. مقسومة ع دفعتين كمان.. كل 50 لتر لحال.. والأغلب ما عم يحصل ع هل الـ 50 لتر تبع الدفعة التانية.. متل ما صار السنة الماضية والسنين يلي قبلها.. فالأغلب وخصوصي أهالي الأرياف اتدفوا ع الصمود من دون يمين.. لأنو ما حصلوا ع شمة «مازوط» متل الشتويات يلي قبل... ودايماً عايشين ع الوعود الحكومية تبع «الأولوية للي ما استلم قبل»..
لك إذا منحسبا هيك بعقلنا من قبل تخفيض المخصصات.. ومن 2019 ولهلأ بس.. بيطلعلنا بزمة الحكومة أكتر من 500 لتر ما توزعو علينا..
لك ايمته بدنا نعيش شي اسمو شتاء دافئ بالمازوت.. مو متل كل سنة شتاء بارد بالصمود المرشرش تقنيناً علينا من الحكومة!!!!
لك هاد أقل حقوقنا ع الدولة وع الحكومة يا جماعة.. ورغم هيك ع طناش ولا مبالاة واستهتار!!
وبعدييييييييين!!!!!