خبر عام وتعليق هام.. «سيجوع السوريون في أغنى بلد في العالم من حيث الموارد الزراعية»

تعليق: بعد التقدير لحديث الخبير.. الناس اللي عندها خبرة واللي ما عندها صار عندها أرضية وفكرة كافية عن هل الموضوع.. إلا الحكومة اللي بتعرف وبتحرف.. لأنو لولاها ما صار فينا هيك أصلاً.. فالجوع اللي عم نعيشو كلو من وراها وبسببها.. بس كتر خيرو الخبير وضح انو جزء من المشكلة مرتبط بأسوأ إدارة موارد في تاريخ البشرية.. يعني أكيد قصدو الحكومة.. مو هيك؟!

يقول الخبر: «الخدمات الإلكترونية- شركة المحروقات، السادة الكرام: بإمكانكم الاستفادة من الخدمات الإلكترونية المقدمة على منصة USSD عبر الاتصال المجاني على الرمز (#9884*) للقيام بالعمليات المطلوبة».
تعليق: النكتة بالموضوع إنو أغلب الوقت بيضل يطلع للعالم بعد الاتصال رمز «Error» يعني خطأ... والحجة دائماً وكالعادة هو الضغط ع الشبكة... وكالعادة إن وجدت الشبكة... لأنو كالعادة ما في كهربا وبطاريات أبراج الشبكة عم تفضى.. والخدمة سيئة.. وكلو تحت شعار التحول الإلكتروني لنواكب التطور... وشو خدمات إلكترونية وشو تطورررررر!

يقول الخبر: «قال رئيس مركز أمن المعلومات في الهيئة الوطنية لخدمات الشبكة: إن الخدمات الإلكترونية التي تطلقها الحكومة تقابل بـحجم استهداف كبير، وأضاف لا تكاد جهة عامة تطلق خدمة إلكترونية حتى يبدأ الهجوم عليها بقصد الاختراق، أو الإغراق، لمنع الخدمة عن المواطن السوري».
تعليق: شفتوا كيف يا مواطنين إنكن ظالمين الحكومة!!! طلعت المشكلة من حجم الاستهداف الكبيييير.. يعني لا الخدمة الزفتيشن ولا النهب والفساد والتوفير ع حسابنا... والموضوع أكبر مننا ومنهن... اختراق خارجي.. ولك روحي... الخارج بيهموا كتير إنو المواطن السوري ما يحصل ع رسائل الغاز والبنزين والمواد الغذائية المدعومة.. لك عاااااااايب عاااااايب مالنا ولاد صغار ولوووو....

يقول الخبر: «مدير عام المؤسسة العامة لنقل وتوزيع الكهرباء، إن المعدات التي وصلت محافظات «اللاذقية- طرطوس- حمص» لن تساهم بخفض التقنين أو صيانة الشبكة الكهربائية».
تعليق: شخص فينا نحترموا... ع الأقلية عم يحكي بالمشرمحي، وبعين هالقد قدها.. أنو ما ح يصير تخفيض ع التقنين... مو عم يصف حكي ووعود ترللي... بس رغم هل الشي.. طيب ليش هالمعدات إذا ما ح نستفاد منها ع مستوى تحسين الكهربا؟! فعلاً عجبي منكم.. لك رجعتو البلد 50 سنة لورا..