خبر عام وتعليق هام.. «زيادة ساعات التقنين الكهربائي نتيجة انخفاض كميات الغاز»

تعليق: خلال الأيام الأخيرة؟؟ يعني ع أساس كان التقنين مشهي العالم يضلوا عايشين ع التقنين مثلاً؟؟ بعدين وين الوعود ووين التصريحات يلي ع أساس رح تفرجينا انفراجات بالشهر الرابع ع صعيد الكهربا؟.. صح نسينا.. ع الوعد يا كمون....

يقول الخبر: «كشف رئيس القطاع النسيجي وعضو غرفة التجارة في دمشق وريفها، أنه يعتبر موسم الألبسة الحالي هو الأضعف منذ ثلاثين عاماً، وذلك خلال العشرين يوماً الأولى من شهر رمضان، حيث سجلت نسب البيع تراجعاً كبيراً نتيجة ضعف القدرة الشرائية للمواطنين».
تعليق: تقولوا العالم بهل البلد معها مال قارون بس متبخلنين ع مشترات الألبسة يلي أسعارها ما بترحم كمان مو هيك!! لك العالم جوعانة.. جوعانة وما عم تقدر تنام شبعانة هية وولادها... إذا القدرة الشرائية للمواد الغذائية متراجعة بشكل كبير فشو ناطرين بالنسبة للألبسة برواتب الكل معتبرها خرجية لأول يومين بالشهر؟؟

يقول الخبر: «أكد رئيس نقابة التمريض والمهن الصحية في ريف دمشق، أن التمريض هي الفئة الأكثر ظلماً من الفئات التي تعمل ضمن المشافي».
تعليق: أكيد معو حق رئيس النقابة بهالحكي.. لك ورجونا موظف بسورية مالو مظلوم.. الأجور هية وقلتها.. مقابل الأسعار اللي بتحسسك كأنك عايش بالخليج وعم تقبض بالمغضوب اللي ما بيتسمى؟!

يقول الخبر: «كشف عضو المكتب التنفيذي المختص بقطاع النقل في اللاذقية، عن إعطاء السرافيس كمية تتراوح من ١٠ لـ ١٥ ليتراً من مادة المازوت المدعوم يومياً خلال أيام العطل، مبيناً أنه تم تأمين حركة النقل الخارجي، حيث تم تزويد البولمانات، «المقطوعة» بالمازوت».
تعليق: أهم شي أنو 10 ليترات لكل سرفيس بيوم العطلة أكيد ما ح يحل مشكلة النقل بهاليوم.. بس كيف صار أنو تتراوح الكمية بين 10-15 ليتر.. وع أي أساس يعني؟ ولا في خيار وفقوس متل العادة!

يقول الخبر: «وزير التجارة الداخلية وحماية المستهلك السماح لكافة الفعاليات التجارية إجراء تنزيلات على منتجاتهم حتى نهاية عطلة عيد الفطر».
تعليق: حماية المستهلك تسمح بإجراء تنزيلات على المنتجات!!! لا تخرج قبل أن تقول سبحان الله.. طلع تنزيل الأسعار بدو قرار حكومي.. واللي ما بيلتزم فيه بيتخالف.. أما رفع الأسعار فمن راس التجار لحالن وع كيفهم... شو المطلوب نفهم من هل الحكي يعني؟!