الطابة دائماً بملعب السوق السودا

لأنو الحكومة الفريدة والوحيدة بالعالم يلي أكلة هم مواطنيها... بكل فخر هي الحكومة السورية... رجاء ما حدا يضحك.. لأن ما عاد في شي خرج الضحك!
ما علينا...
هلأ الكل بيكون عم يسأل حالوا يا ترى ليش المواطن أول ما يسمع الجملة يلي فوق بيصيبوا هلع؟؟
لأنو ببساطة حكومتنا وقت بتحكي فهي عم تبيع حكي... ودايماً الفعل بيكون نقيض الحكي تماماً...
وبعد الحكي المواطنين كلون بيجن جنانون وبيلعنوا الساعة يلي سمعو أو قرأوا شي تصريح من هل التصاريح ع قد ما بيصير فيهون بعدين...
مثلاً... بتاريخ 12 أيلول الجاري، تحدث وزير التجارة الداخلية وحماية المستهلك في لقاء تلفزيوني عن آلية بيع الغاز المنزلي، وقال «أنه سيتم احتساب عدد اسطوانات الغاز على البطاقة وفق عدد أفراد الأسرة... مثل الخبز، دون أن يذكر التفاصيل».
طبعاً هاد الحكي بيدخل ببوابة «إيصال الدعم لمستحقيه».. العبارة اللي خلتنا نفوت بالحيط.. لأن ع ايدين الحكومة والحيتان اللي وراها صار أكتر من 90% من السوريين بيستحقو الصدقة مو بس الدعم..
هلأ مثلاً مثلاً، بما إني عايشة لحالي بالبيت ما معي حدا بيطلعلي 200 غ من الغاز المنزلي بالشهر؟ ولا كل 3 أو 4 شهور جرة كاملة وأنا حرة التصرف فيها ع ملذاتي الشخصية متل التدفئة أو للمتة أو للفحم أو للأكل أو ممكن بيعها بالسوق السودا كونها مربحة جداً؟ ولا بيطلعلي جرتين بالسنة كمان مع حرية التصرف بهل الجرتين؟؟
يلي بيسمعوا لسيادتو هيك عم يحكي بيقول إنو كل المواطنين عم يستلموا الجرة بالوقت المحدد اللي هو 23 يوم.. لك وشهرين وقلنا ماشي الحال.. مو عم يشوطوا هل الشعب للـ 90 يوم ليستلموا الجرة ومنون عيل بخمس أفراد يا عفو الله!!!
خطر ببالي سؤال فظيع....
يا ترى رح يشكلوا لجنة تدور ع البيوت ليعملوا إحصائية بعدد السكان الفعليين بالبيت ولا كيف؟ لأن الاعتماد ع ذكاء البطاقة طلع خرطي لحد هلأ!
لأنو ممكن المرا تكون تاركة البيت وحردانة شي شهرين تلاتة ببيت أهلها أو بدها توفر شوية مصاريف ع حالها بهالظروف الكارثية.. هيك خيو ما حدا الو عندها شي.. أو الرجال عندو شغل برا المحافظة وتارك عيلتو بالبيت حتى يأمن مدخول إضافي... أو واحد من الولاد عم يدرس بغير مدينة.. هدول مثلاً مثلاً، بينحسبوا ضمن العايشين بالبيت ومن ضمن المحسوبين ع الدعم ولا مالون علاقة؟ ولا بينحسبو من المتلاعبين بالدعم وما بينطبق عليهم مقولة ايصال الدعم لمستحقيه لأنهم برات الحسبة؟!
طيب خطر ببالي سؤال تاني فظيع كمان...
بما إنو قبل ما يطلع هل التصريح وهل القرار هاد مع تخفيض الدعم المباشر واللامباشر كان سعر الجرة بالسوق السودا من الـ 70 ألف وأنتو طالعين حسب طمع المحتكرين... يا ترى شو رح يصير سعرا بالسوق السودا بعد ما تصير ع عدد أفراد الأسرة يا بعدي؟؟ لأن متل العادة بعد كل قرار بتتنشط هالسوق.. وكأنوا قرارات الحكومة بتطلع مشانها وبس!
فيا ترى ملعب السوق السودا إيمتا رح يتسكر.. واللاعبين والحكم يلي فوق راسون إيمتا رح يوقفوا لعب.. يعني مو حاجة يفوتوا غوال ع الشعب كلو؟؟
لك حااااااج وكفاها الله.. يعني تخنت كتييييييير!