«إن عرف السبب... بَطُلَ العجب»

وطبعاً ما فينا نخفي عليكون شوية من تفسيرات الشعب ونحن ناطرين هل المقلب المرتب اللي أكلوه!!!
أي كلنا منعرف ضمنياً شو هو المقلب يلي ناطرنا والنهبة الجديدة حتكون كالعادة من جيوبنا...
وبتاريخ 22 أيار أعلنت الهيئة الناظمة للاتصالات (وحطو مليون خط أحمر تحت كلمة ناظمة، منشان أهمية عملها بنهب جيوب المواطنين) المقلب المنتظر...
ألا وهو «سيتم منح أصحاب الأجهزة الخلوية التي عملت على الشبكة السورية لغاية تاريخ القرار الذي قضى بتعليق التصريح، بتاريخ 18 – 3 – 2021، فترة سماحية تنتهي بنهاية شهر حزيران 2021».
طبعاً، وتم تحديد سعر التصريح لكل شريحة من هل الأربع شرايح، ويلي بدت من سعر الـ 130 ألف ليرة لـ 500 ألف ليرة للشريحة الرابعة...
بس شيلونا من أسعار التصريح الجديدة، ويلي وصلت للسما ع قد مالها مرتفعة، وخلونا ننظر من الجانب التاني لكمالة التصريح للهيئة...
«لفتت إلى عدم استخدام أي جهاز خلوي لا تطابق أرقامه التعريفية مع الرقم الموجود على علبة الجهاز حفاظاً على حقوقهم والإبلاغ عن أي محل صيانة أو بيع أجهزة خلوية لا يلتزم بالتعليمات الصادرة عن الهيئة».
سمعتولي شو؟؟؟ حفاظاً على حقوقهم... بتقصد حقوق المواطنين يلي ممكن يتعرضوا للسرقة يا تقبشوهن...
اااااي شو بدو يقول الواحد غير إنو يكتر خيركون إنو ما عم تخلوا حدا غيركون يسرق هل المواطن يلي تلت رباعون عم يجيون هل الموبايل من برا هدية لأنو حق الموبايلات اليوم «صرعة وكسرة خاطر إلون»...
وهلق صار فينا نرجع لأسعار التصريح مرة تانية...
حبيباتي شو مفكرين تعملوا بهل العباد هي؟
يعني إذا الواحد انبسط واجاه موبايل هدية لأنو عايف حالو وما فيو يشتريه من هون لازم تلعن أفطاسو وتمصو دمو ع دم يلي بعتلو الموبايل بالجمركة تبعو؟
بالمناسبة، عالم كتير فهمانة عليكون وقالت: خلوني متخلفة قدام البشر واحمل موبايل بيقول «ألو» بس... وضلني فاتحة باب رزقي كونوا الموبايل لا يعتبر من الرفاهيات بل هو باب رزق ومصدر عيش.. يعني فيكم تقولو عنو أداة إنتاج وعمل للبعض... والموبايل التاني بستخدموا بس لشبكة الواي فاي.. وبحياتكون مارح تحصلوا مني ولا من ولادي يلي عم يبعتولي مصاري ع نكلة!!!
يعني يا عيوني صرتو عم تدفشو الناس دفش حتى يصيرو متلن متل غيرهم من الحيتان الكبار متهربين ضريبياً.. مع الفرق الكبير بين التنين طبعاً.. ريتكم تضربوا ضريبياً شو بتفهمو..