الكبار محميون والصغار كبش فدا

المهم المَتل بيقول: «لن يستطيع أحد إفساد مزاجك ما دمتَ مكتئباً طوال العمر..» ما تواخذونا عدلنا فيه أخر كلمة... لأنو جماعة يللي فوق مو كافيون يوم ليكأبونا فيه.. من دون يمين وعظيم حاطين ببالون يخلونا مكتئبين طول ما فينا نفس وروح... ومن شو؟؟ بس من ورا اعدتون ورا الطاولة وهل ورقة والقلم والمخ اللي عم يأبدعوا منو...
بالله عليكم سمعولي آخر تصريح لمحافظة دمشق، ويلي صار الكل يشاركوا ع السوشال ميديا تحت اسم (مقالات مميزة) «كشفت مدير المكتب الصحفي في محافظة دمشق ريم العبدو، عن قرار فرض رسوم مالية على العربات الحديد (كريجة) جاء لتنظيم وضبط العربات داخل سوق الهال حصراً» وحسب ما قالت كمان «أن القرار جاء بعد حصول عدة حالات سرقة للبضاعة وعدم معرفة الفاعل، موضحةً أن رسم الإشغال لإبقاء العربة في السوق 1000 ليرة سورية شهرياً»... يعني 12 ألف ليرة بالسنة.. يعني أكتر من ضريبة الدخل تبع بعض المحلّات بالبلد يا عالم..
والله كلما عم فكر بحسن النية تجاه هيك نوع من التصريحات والقرارات بحس بشكل لا إرادي بتأنيب الضمير... إنو يا أرواحي يا حبيباتي يا عمراتي يا إنتو انمغصتوا على رزقة هدول العتالة... والله عيب لسا لاحقين لقمة الفقير!!
بس الجانب الحلو بالموضوع بتحس عنا في تطور أكتر من برا «تاتش وود من عيون الحساد».. انتشرت صورة لوحدة من العربات اللي صاحبها شكلوا استسلم ونفذو للقرار، بحيث ظهرت هي العربة وفيها لوحة رقمية مكتوب عليها «محافظة دمشق... كراجة معدنية عجلتين» يا عيني يا عيني، أحبائي أعزائي نور عيوني أنتو.. لا حدا يصدق القصة تبع الحد من السرقة وما شابه من هي التصريحات تبعون.. كل القصة وما فيها عندون هدف وبدون يكفوه وهو التضييق ع الشعب والفقير بالتحديد ومحاربة لقمة عيشوا وهنن ماشين ع مبدأ «الـ1000 من جيبة المواطن المشحر مكسب».. والله أعلم إذا ح يتعمم القرار عـ«الكريجات» بغير أسواق لاحقاً.. اللهم لا نسألك رد القضاء بل نسألك اللطف فيه..
بالمقابل، وزير المالية، قال بحسب صحيفة الوطن... «إنو في رجل أعمال من كبار المستوردين بالبلد، عم يستورد سنوياً بحوالي 9 مليارات ليرة، وبهالـ 3 سنين، قدم بيانات للمالية بإنو خسران كرمال يتهرب من دفع الضرايب، وإنو كل مستوردات رجل الأعمال اللي ما ذكر اسمو الوزير، هية من المواد الغذائية المطلوبة بالسوق، وإنو في كمان تاجر تاني بيدفع سنوياً 150 ألف ليرة ضرايب، بوقت إنو حجم عملوا الفعلي، كبير كتير....» الوزير قال كمان «إنو مشكلتو مع المراقبين بالدوائر المالية، أكتر من المتهربين من الضرايب، لأنو بعض مراقبين الدخل بالدوائر فاسدين، وفي منون عم يدربوا المكلف على أساليب التهرب»...
معاليك، أنت- أنا- نحن- كلنا- المقيمين- المغتربين- الدول الصديقة- يلي بيحبونا- ويلي بيكرهونا- كل الدنية بتعرف هل الشي... بس الحل شو هو برأي حضرتك؟ متل ما قال واحد من هل المواطنين «مراقبين من دون مراقبين!!» لأ، هيك كتير... طالما إنو عندكون هي المعلومات الهامة وبهل التفاصيل الدقيقة ولك لييييشششش لهلق ما اتخذت الإجراءات اللازمة بحق هل المخالفين الكبار هدول ويللي ما رضيت تعلن عن أسماؤن؟! يعني والله بلش الفار يلعب بعبون لهل المواطنين!! لأنو في وحدة قالت «دود الخل منو وفيه»...
بس للأمانة ما عجبني غير هداك يلي قال عن هل الأخبار الهامة «عنجد؟».. لك أي أي عنجد... والقادم أعظم..
عموماً يمكن ما عاد في أي مشكلة من تصريحاتكون يلي «...» لا تهكلوا للهم تبع المواطن المشحر والمهمش أبداً.. إذا كنتوا ناويين تهكلوا للهم، لأنو بالنسبة لتفكيركون ما عاد تفرق معو لأنو صابو فالج كُلي من فلاجية تصريحاتكون... وممارساتكم.. وقراراتكم..