سوء فهم

عبدو: له يا زلمة! لازم تعرف شو صاير بالبلد تطورات . .

حمدو: هلق أنت بدك تسميها تطورات، أنت حر، بس أنا بسميها صدمات، وخيي أنا بعيد عنك، معي سكر وقلب وما بلقى صدمات، يعني رح حس بالمصيبة أولتها وآخرتها، بقا مو مستعجل. متل وقت رفعوا الدعم . . .

عبدو : لااااء بزعل منك.. ما حدا رفع الدعم، الجماعة قالوا: (إعادة توزيع الدعم لمستحقيه)، أنا بصراحة هيك تفاءلت، ولهيك عم قلك: (تطورات) . . يعني أنا متلك مليت من الشعارات، ومو كتير بيهمني اسم النظام الاقتصادي المتبع، لأن شكلن الجماعة ملبكين بالموضوع، وكل كم يوم بيغيروا الاسم، لذلك وقت سمعت كلمة (إعادة توزيع)، قلت الجماعة بلشوا يفكروا صح . . يعني نحنا مصيبتنا أنو الأرباح 80 % والأجور 20 % والضريبة 11 % بيدفعها أصحاب الأجور، و0.6 % أصحاب الأرباح، وإذا هالشي تغير، كل شي بيتغير، وأنا اتحملت كل هالعمر. . قلت يالله، بنتظر كم شهر.. يعني هنن صح رفعوا الدعم وزادت الأسعار، بس لسا في إعادة توزيع الدعم لمستحقيه . .

حمدو: وأنت مين قلك إنو الزلمة قاصدك إلك بـ «مستحقيـ (ــه)»

عبدو : لا تقولها!! فاتتني هي . . خاصة أنو عياش وجماعتو ما بيعرفو يستخدموا الضمائر.... يعني قولتك راح علينا الدعم؟؟

توزع ومشي حالو!!؟

حمدو : إي صح النوم!!