لقمان ديركي
صفر بالسلوك السلام عليكم يا طقطق
من مصادر موثوقة قالوا لي أنو العالم انبسطت بساحة الأمويين بحفل الافتتاح الناري والمائي والهوائي والترابي كما صرحت المذيعة أثناء شرحها لمفردات الحفل، وقد شرحت أن هذه الكرة السابحة بحمده في الهواء تمثل الأرض وأخرى تمثل القمر وثالثة تمثل الشمس، وشرحت أن الراقصين يخرجون من نوافذ دمشق ويتسلقون جدران دمشق وأن المطر يهطل فيتمايل الراقصون مع النسيم العليل تحت مطر الربيع، ومن أقوالها في تفسير العرض:
( يضاء الضوء بالضوء فتدخل الشمس ويستسلم الراقصان للريح فيتمايلان على أنغام زينوا المرجة)، طيب يزينوا المرجة مين ماسكهم؟!!، وليش بساحة الأمويين، قال لأنو قالوا للجنة الثقافة بدنا نعمل سنة للثقافة بعاصمة الأمويين، قام اللجنة فحصت وبحثت وبحبشت على هالجملة قام ما طلع معها غير ساحة الأمويين كأقرب شي، ومن هنا انطلق حفلنا الذي قالت المذيعة فيه ( الألعاب النارية تدير حواراً بين ساحة الأمويين وجبل قاسيون)، وقالت ايضاً في وصف الراقصين المعلقين حوالين الطابات السابحة بحمده ( ثلاثة عناصر طائرة.. الشمس والقمر والإنسان) ولكنها خافت أن لا يفهم عليها الإخوة المشاهدين من أمثالي فعقبت( والإنسان المتمثل بالراقصين)، وهي بهذا متأكدة بأننا فهمنا أنو الطابتين يعني الشمس والقمر كتَّر خير الله وخيرها، ولم تنس أن تسأل المذيع الذي يجلس بجانبها متفاجئاً بالحفل ومندهشاً وطايرة ضبانات عقله ( شو حابب لسه يفاجأك المهرجان؟!)، ولم يجب المذيع كما يجب لأنو كان متفاجئ.. لكن هالمرة مو بالمهرجان بل بالسؤال، وسين سؤال لأولي الألباب من اللي حضروا المهرجان شخصي ومن اللي حضروه عالتلفاز ومن الغياب، يا ترى ليش جابوا فرقة من إيطاليا مشان يتعلقوا بالحبال ويقلبوا كم تقيلة بالهوا على أنغام ما بنزل ما بنزل يا دادا ما بنزل ألا بحلق ألماس؟!.. جيم جواب.. لأنو إذا جبنا راقصات شغل عنا كان ما صدقوا أول ما سمعوا هالنغمة وقعدوا يتمايعوا ويتدلعوا ويتخصوروا ويتبنصروا، بينما الراقصات الإيطاليات جديات وما بيقلبوا غير تقيلات رياضية جادة هادفة حتى لو كانت النغمة نايطة ومايعة وطالعة من بيت أبوها ورايحة لبيت الجيران، وسين سؤال كمان .. طيب ليش جايبن ضرِّيبة الصواريخ من إيطاليا مع أنو إذا بلغ لنا الفطام في عالم الفتيش صبي خرَّ له الجبابرة راكعينا، جيم جواب.. لأنو هاد الأجنبي رح يضرب كل الصواريخ وكل الفتيشات وما رح يضب له كم علبة بجيبته ويروح يبيعهم بسوق التهريب بالقابون في الأعياد، طيب سين سؤال .. من وين جبتوا كل هالألعاب النارية مع أنها ممنوعة.. أنا شخصياً بشتريها من المهربين اللي بيمشوا بالسوق وهنن عم ينادوا لزبون واحد فقط بشكل سري ورخيم وعبر كلمة سر يعرفها الجميع ( فتيش.. فتيش)؟!.. جيم جواب .. إي ما في جواب يا.. عليتوا قلبنا .. لا بيعجبكم العجب ولا الصيام برجب.. كل ما هنالك أنو عملنا شغلة حلوة وانبسطوا العالم فيها .. والعالم بالبسط والفرفشة ما رح تسألك مين ضرب هالصاروخ .. ومين اللي عم تتدندل وتقلب بالهوا، يعني بصراحة من وين بدنا نجيب ناس بيرفيكت بهالقصص كلها، بقى برضانا عليكم نحنا بدنا نبسطكم، وشايفين بعيننا أنو هالشغلات صعب نعملها بإيدنا مع أنو صنعنا منصات الفتيش بإيدنا، سين سؤال.. والله العظيم أحييكم على هذا الصنيع وهذا يدل على أننا نستطيع أن نعمل الحفل بأنفسنا من طقطق للسلام عليكم.. بقى طقطق وعملناها بإيدنا.. ليش ما عرفنا نعمل السلام عليكم؟!.. والا البونا سيرا أحلى وأهضم وأسهل؟!!!!!!!
وبالنتيجة ما لي زعلان غير عليك يا طقطق، تعبتوا وعملتوا واشتغلتوا مشان يجيبوا لكم بوناسيرا عليكم، لك آااخ.
