خبر عام وتعليق هام... تعليمات تنفيذية تتعلق باستثمار الحدائق العامة ستصدر قريباً!

تعليق: يعني ما فينا نقول إلا الله يجيرنا من التعليمات بعد ما تصدر... لأن قبل التعليمات كنا مو خالصين من تغول الاستثمار بالحدائق العامة فكيف بعدها... يعني يمكن فعلاً نخسر الحدائق العامة كمتنفسات أو أماكن ألعاب للأطفال... وخود ع مطاعم وملاهي وكافيهات وأكشاك وأراكيل وخدمات تبع النجوم مشان يتمتع فيها اللي معو مصاري.. مقابل حرمان الفقراء منها.. مو هيك عم يصير؟!

يقول الخبر: رئيس غرفة تجارة دمشق: انخفاض في عدد المنتسبين ليصل مؤخراً إلى 8200 منتسب بعد أن كان خلال العام الماضي 9890 منتسباً، وذلك لعدم قدرة الفعاليات التجارية على الاستمرار بالعمل نتيجة ارتفاع التكاليف والنفقات المترتبة عليها، والضرائب المرتفعة مع فرض التسجيل بالتأمينات الاجتماعية على الفعاليات التجارية الصغيرة.
تعليق: أرقام التراجع أعلاه مو غريبة أبداً... لأن كل شي بالبلد عم يتراجع... من الصناعة للزراعة للتجارة... ما في شي عم يزيد فيها إلا الفقر والجوع والمرض... والظواهر السلبية والآفات الاجتماعية... وكل هاد بسبب حجم النهب والفساد الكبير...

يقول الخبر: وزارة الاتصالات وتقانة المعلومات: تقديم الاعتراضات على استبعاد البطاقات من الدعم الحكومي لا يزال مستمراً ومتاحاً عبر المنصة الإلكترونية المخصصة.
تعليق: الأكيد مو المهم إذا كانت المنصة الإلكترونية لسا عم تستقبل طلبات الاعتراضات... لأن الأهم شو صار فيها... يعني من باب الشفافية ياريت لو تخبرونا عن عدد اللي تم إعادتهم للدعم بعد الاعتراضات... وعن أعداد المستبعدين الإضافيين... مو هيك؟!

يقول الخبر: وزارة التربية: بدء امتحان كل مادة من مواد الدورة التكميلية الثانية للشهادة الثانوية 2024 في الساعة 9:00 بدلاً من الساعة 8:00 صباحاً نظراً لتحديد المراكز الامتحانية في مركز المحافظة حصراً مع الحفاظ على تاريخ ومدة الامتحان وفق ورودها في البرنامج الامتحاني.
تعليق: يعني التصريح فيه مواربة بأنو الطالب معو ساعة صباحية ليلحق يوصل للمركز الامتحاني... لأن المراكز الامتحانية بمركز المحافظة... بس بالمختصر المفيد كل طالب بالقرى وبالريف البعيد والقريب عن مركز المحافظة بدو أكتر من ساعة عذاب وتعب ليوصل ع الموعد. يعني كتر خيركم بهالساعة الصباحية المزدحمة!!

يقول الخبر: أطلق فرع المصرف التجاري في طرطوس مبادرة تسهيل فتح الحسابات المصرفية للحالات الإنسانية ممن لا يستطيعون القدوم إلى المصرف عن طريق تكليف مجموعة من الموظفين بالذهاب إلى المنازل لأداء هذا الغرض، وقد يتم تعميم هذه التجربة على بقية المحافظات والمصارف.
تعليق: مبادرة إيجابية طبعاً وبتتسجل لفرع التجاري بطرطوس... بس معقول هيك مبادرة ما تتعمم وترتبط بمفردة «قد».. يعني الحد الأدنى المفروض إدارة المصرف التجاري تعمم ع فروعها لتتبنى المبادرة... ولا يمكن فيها إحراج لا سمح الله!!

يقول الخبر: وفا تيليكوم: تبدأ تنفيذ المرحلة الأولى من خطة التغطية والانتشار في دمشق وريفها وفق الجداول الزمنية الموضوعة.
تعليق: ههههه... لك عن أي جداول زمنية عم يصير الحكي... وكمان ع مستوى دمشق وريفها بس... المفروض كانت تقلع بالعمل من سنة بحسب الجداول الزمنية الموضوعة... أما شو التزام... وشو متابعة ورقابة من الهيئة الناظمة للاتصالات ومن الوزارة المعنية... حظوظ لك عمي!!