خبر عام وتعليق هام.. دمشق.. نسبة توزيع مازوت التدفئة وصلت إلى 95%

تعليق: ولووووو.. لك خلص فصل البرد... وع هاد الشكل من نسب التوزيع معناتها راحت ع الناس حصتها من الدفعة التانية كمان.. هيك تعودنا ع إيدين المهتمين من الرسميين!!

يقول الخبر: عميد كلية الإعلام: دخول أعداد ضخمة إلى كلية الإعلام سواء العام أو المفتوح وحتى الافتراضي أثر على القدرة على التدريب وسوق العمل الذي لا يحتمل كل هذه الأعداد من الخريجين، طرحنا مقترح امتحان معياري مؤتمت للطلاب المقبلين للدخول إلى كلية الإعلام، ومن الممكن أن تليه مقابلة مع لجنة في الكلية.
تعليق: لك مو ع أساس أنو سياسات القبول الجامعي والاستيعاب والمفاضلات مبنية على دراسات وبيانات.. بما فيها احتياجات سوق العمل.. شو عدا ما بدا.. يعني وين المشكلة.. بالسياسات ولا بالمفاضلات ولا بسوق العمل.. ويا ترى الامتحان المعياري هو اللي ح يحل هالمشكلة... ولا المقابلة ح تطلع الزير من البير.. ولا ح تكون مشكلة إضافية بالنسبة للطلاب مو أكتر.. وح تشتغل الوسايط والمحسوبيات... لك معقول هالحكي يا رسميين؟!

يقول الخبر: وزير الكهرباء: مشكلة تردي الكهرباء سببه نقص توريدات المشتقات النفطية والتي من المتوقع أن تنتهي منتصف الشهر الجاري مع بدء وصول التوريدات، لتعود مخصصات الوزارة بما يكفي لتشغيل مجموعات التوليد المتوقفة. علماً أن المشكلة كانت قد بدأت منذ أكثر من 15 يوماً، نتيجة استهلاك كمية كبيرة من المخزون الإستراتيجي خلال فترة عيد الفطر، ما اضطرنا إلى إجراء كبح في الاستهلاك وإيقاف بعض محطات التوليد.
تعليق: ما في جديد بالحديث الرسمي عن نقص التوريدات... ذريعة قديمة وممجوجة من كتر ما تكررت.. مع العلم انو الاستمرار والتكرار بتتحملو الحكومة اللي المفروض تكون عاملة حساباتها مسبقاً... أو هيك يفترض... وكمان الاعتراف بكبح الاستهلاك... يعني بزيادة ساعات التقنين ع الناس.. وبوقف بعض محطات التوليد... مو جديد... غيرولنا هالنغمة الله يرضى عليكم.. لك والله ملينا وتعبنا من مبرراتكم وذرائعكم وانتو لا تعبتو ولا مليتو!!

يقول الخبر: انتهت فعاليات معرض ومؤتمر الدفع الإلكتروني الثاني EPEX الذي أقامته الجمعية العلمية السورية للمعلوماتية بالتعاون مع شركة ثقة للمعارض والمؤتمرات في فندق داماروز، والذي يهدف إلى تسريع تبني الدفع الإلكتروني في سورية وتعزيز أمنه وفعاليته.
تعليق: لك ما حدا ضد تسريع التبني اللي عم ينحكى عليه.. بس وين البنية التحتية اللي ممكن الاعتماد عليها بهاد الموضوع.. كهربا زفت واتصالات ألعن وأدق رقبة... والنت بسلامتك... وفوقها عم يصير فرض التعامل بالدفع الإلكتروني ع الناس.. لك شو بتعمل الناس بحالها... وشو بتستفيد من مؤتمراتكم!!

يقول الخبر: مدير مؤسسة المياه والصرف الصحي: لا حالات تسمم بسبب المياه في مدينة التل في ريف دمشق، تم قطع المياه عن أحد الأحياء وإمداد الأهالي عن طريق صهاريج مياه نظيفة حتى تم إصلاح خط الصرف الصحي تحت الأرض.
تعليق: يعني منيح انو قطعتو المي.. ومنشكر الله انو ما في حالات تسمم.. بس يا ترى قصة صيانة شبكات الصرف الصحي الدورية وينها قبل ما نوصل لمرحلة التسرب وقطع المي عن الناس.. وهالحكي للتعميم طبعاً.. لأن المشكلة مو بس بالتل بكتير مناطق تانية كمان!!

يقول الخبر: وزارة التربية: تعمم بضرورة تقيد جميع العاملين المكلفين بالأعمال الامتحانية (مراقبة- تصحيح- مناقشة سلالم) بالحضور في المواعيد المحددة تحت طائلة المسؤولية، وتجنباً لفرض العقوبات المسلكية الأشد وذلك في حال الغياب دون عذر مبرر مسبقاً وبكتاب رسمي حصراً من مدير التربية في المحافظة.
تعليق: يعني ما بيصير بدون التهديد بالعقوبات... كأن المدرسين مو ناقصهم إلا زيادة ضغط عليهم فوق مو مضغوطين.. يعني مثلاً ما بيمشي الحال بلغة التشجيع... أنو اللي بيلتزم ألو مكافأة مجزية.. أو هدية محرزة.. أو إجازة مأجورة.. مثلاً يعني مثلاً.. لأن منعرف أنو هاد من المستحيلات!!