خبر عام وتعليق هام.. «المؤسسة العامة للتبغ ترفع أسعار الدخان الوطني بكافة أنواعه»

خبر عام وتعليق هام.. «المؤسسة العامة للتبغ ترفع أسعار الدخان الوطني بكافة أنواعه»

يقول الخبر: «المؤسسة العامة للتبغ ترفع أسعار الدخان الوطني بكافة أنواعه».

تعليق: أي مو يسلملي المنتج الوطني يلي عم يرفع حالو مع ارتفاع هداك الملعون بالسوق السودا... لك شو الشي يلي لسا ما رفعتوه؟؟ المواطن المنتوف لسا برأيكن بينتتف بزيادة؟؟ ولا هلق عم تحاولوا تعصروه عصر؟؟ هفففففف بقاااااااااا ولووووووو

يقول الخبر: «أعلنت المديرية العامة للآثار والمتاحف التابعة لوزارة الثقافة عن اكتشاف لوحة فسيفسائية أثرية نادرة في مدينة الرستن في ريف حمص تعود للعصر الروماني، وكشف مدير دائرة الآثار والمتاحف أن المديرية اشترت البيوت والواقعة فوق اللوحة، وهي 3 منازل مبدئياً، بدعم من متحف نابو».
تعليق: يا ترى بقديش اشتروا البيوت التراثية السياحية والاستثمارية التلاتة هدول؟؟ بكم مية ألف متل ما انعمل مع غيرن من المواطنين تحت عنوان «الاستملاك الحكومي»؟ ولا ع حساب متحف نابو؟ وأبصر شو نابو ليلي نابو طويل وحد منهم.. لك دخيل هل الرزقة يلي عم يرتزقوها من جيبة المواطن وع حسابو الشخصي.. حتى ولو طلع بلوشي ايد من ورا وايد من قدام... المهم شو اللي نابو لنابو.. لك عيني!!

يقول الخبر: «دعا محافظ دمشق لدراسة تعديل التعرفة التي يطالب بها أصحاب وسائل النقل من خلال التنسيق بين المحافظة ووزارتي «التجارة الداخلية وحماية المستهلك» و«النفط والثروة المعدنية» نظراً لارتفاع أسعار قطع الغيار، وتكاليف الإصلاح، على أن تكون منصفة لأصحاب هذه الوسائل والمواطنين ومعالجة الشكاوى الواردة بالسرعة القصوى في حال التأكد من أنها محقة».
تعليق: بما إنو في تنسيق مع وزارة التجارة الداخلية وحماية المستهلك فالمواطن ضمنياً فهم وش السالفة والمفهوم من هل الدراسة... بس يلي مو مفهوم بهل الدراسة كيف حتكون منصفة للمواطن وك روحي؟؟؟ اكسكيوزمي منكن مش مفهومة يعني.. يرجى التوضيح...

يقول الخبر: «أسعار الفروج ومشتقاته، تسجل ارتفاعاً واضحاً بتاريخ 16/10 بحسب النشرة الصادرة عن مديرية التجارة الداخلية وحماية المستهلك بدمشق، تسعيرة التموين لصحن البيض بـ 13500 ليرة، فروج بروستد 33500 ليرة، كيلو شاورما 44000 ليرة».
تعليق: ما بيضحّك هل الشعب غير كلمة حماية المستهلك... ما علينا... المهم إنو عنا رفعة جديدة بالأسعار، لأنو الأسعار بالسوق سابقة كتير هل النشرة... ومن هنا ومن مقعدنا هذا نؤكد للعالم إنو مديرية التجارة الداخلية وحماية المستهلك مالها خبر بولا شي ع أرض الواقع.... وشكراً...

معلومات إضافية

العدد رقم:
1092
آخر تعديل على الثلاثاء, 18 تشرين1/أكتوير 2022 10:45