خبر عام وتعليق هام.. «وزير التجارة الداخلية وحماية المستهلك انخفاض قادم لأسعار المواد الأساسية مع توفرها بكثرة في الأسواق»

تعليق: يا ماشالله... لك قديش سمعنا من هل الحكي وصف عبارات تفاؤلية- لا حقيقية ع أرض الواقع متل هل الجملة اللذيذة من قبل؟؟؟ طيب عزيزي المواطن معناتها استعد لفقدان المواد الأساسية وتوفرها بعد فترة زمنية قصيرة بالأسواق بسعر هاهاهااااااااااااااااااااااا... حفظناكن....

يقول الخبر: «وزارة الصحة سجلت قبولات بعض المشافي في حلب زيادة في أعداد المراجعين بشكاية اضطرابات هضمية، وبعد إجراء التحليل لعدد من الحالات المشتبهة بالكوليرا».
تعليق: يا ترى مين المسؤول الأول والأساسي عن هل الإصابات، قلة الوعي والاستهتار من قبل الأهالي متل ما ديماً بيحطوا الحق عليهن، أو من انعدام وجود الكهربا ولجوء العالم لشراء مكعبات التلج ليقدروا يشربوا المي.. وانقطاع الرهيب للمياه، يلي عم تشهده حلب، وأغلب المناطق السورية؟؟ واليوم تم الإعلان عن 17 حالة كوليرا، بس مع هل الكم الهائل من العالم يا ترى حيصير فينا متل ما صار وقت الكورونا، وح نشوف عمل حكومي حقيقي لمواجهة الكوليرا، كرمال ما نخسر ولادنا متل ما صار فينا بالكورونا ولا شوووووو؟؟؟

يقول الخبر: «وزارة الاتصالات: تأثر خدمة الإنترنت بشكل نسبي بسبب خلل فني على تجهيزات المزودات الدولية للخدمة».
تعليق: عذراً من خاطركن.. ليش هل السلحفة هي يلي اسمها «إنترنت» في سورية حاسبينها علينا خدمة؟؟ بعدين النت عنا من دون هل الخلل الفني متأثر تأثر فظيع ورهيب من الخلل التقني والنهبوي يلي عاملينو قصداً.. لهيك فيكن تصرحوا وتقولوا تأثر سلحفاة الإنترنت بشكل أسوأ من السابق... والله كرمال العالم ما تستلمكن بالحكي.. وشكراً...

يقول الخبر: «رئيس مجلس الوزراء خلال مشاركته في أعمال المجلس العام للاتحاد العام لنقابات العمال: وصل مجموع الأقماح المستلمة من الفلاحين لهذا الموسم إلى 520 ألف طن، بينما يبلغ الاحتياج السنوي نحو 2,3 مليون طن، ويتم توريد باقي الكميات، حيث تم التعاقد على 600 ألف طن، وبدأت الشحنات بالوصول بداية الشهر الحالي، ولن يتم السماح بحدوث أية مشكلة في توافر القمح والمشتقات النفطية تحت أي ظرف».
تعليق: عجب وين عم يروحوا هل الفلاحين بالدعم الحكومي لحتى المحصول ما عم يكفي الموسم؟؟؟ إبر البنج ما عم تفي بالغرض سيادتك... أحسن ما تقولوا شحنات وتوريدات والذي منو.. ادعموا فلاحينا بالأسمدة والمازوت والكهربا.. لك منصير نغطي حاجتنا من الموسم.. لا وفوقها يمكن نصدر مو نستورد يا عيوني!!!