خبر عام وتعليق هام..

تعليق: يعني بهل الحالة كل فرد بسورية كم قطعة حلو طلعلو دخلكن؟؟ طبعاً إذا افترضنا إنو كل العائلات السورية المعدومة والحرامية المليارديرية اشتروا حلواً فاخراً وغير فاخر.... لك عيني 90% من الشعب ما معو يجيب عوامة ليتحلى فيها بالعيد.. قاعدين عم تقولوا 30 طن.. ونوع فاخر!!

يقول الخبر: «بلغ عدد المغادرين من الأراضي الأردنية نحو الأراضي السورية، عبر مركز نصيب– جابر الحدودي، خلال فترة عيد الفطر، نحو 5 آلاف مسافر، معظمهم من الأردنيين «
تعليق: يا قطقيط.. فيكن تخبرونا هدول كيف عم يتجولوا بأرجاء سورية.. وسورية كلها فيها أزمة بنزين خانقة؟؟ ولا ليكونوا عبوا من ناقلتي النفط يلي ما شاف الشعب منن شي لهلأ؟؟ ولا ليكونوا دخلوا وبنزيناتن معن!!! ولا منفهم انو في حجة احتكار بنزين جديدة لصالح السوق السودا؟

يقول الخبر: «بالتزامن مع اشتداد وتيرة أزمة المحروقات، أعلنت الشركة السورية لتخزين وتوزيع المواد البترولية تخفيض كميات التعبئة من البنزين المدعوم الممنوحة لأصحاب الدراجات النارية .«
تعليق: أزمة المحروقات شكلا ح تستمر مع استمرار أشكال التخفيض بالكميات المخصصة والمدعومة.. يعني لا تستغربوا بعد فترة يصير توزيع المحروقات بالسرنكات.. بنفس الوقت ح تبقى السوق السودا شغالة على عينك يا تاجر.. ولك يا عيبشوم بس!

يقول الخبر: «بينت وزارة التجارة الداخلية أن ما يشاع حول وجود تسعيرة جديدة لمادة البنزين في سورية، عار عن الصحة .«
التعليق: يمكن قصدن إنو البنزين المدعوم- غير الموجود- هاد الخبر يلي مو عار عن الصحة أبداً.. لأنو بسم الله ما شاء الله ولا حول ولا قوة إلا بالله.. البنزين المدعوم ما في يا عيون العمو.. والخوف انو النفي الحالي يكون مقدمة لرفع السعر متل العادة.. ع كل حال بكرا بيدوب التلج ويبان المرج!

يقول الخبر: «كشف مدير حقول الجبسة، عن عودة ضخ الغاز الطبيعي من حقول الجبسة في محافظة الحسكة إلى محطة الريان بحمص بطاقة يومية تتراوح ما بين (مليون و300 إلى مليون و500) متر مكعب «
تعليق: أكتر شي بيريح بحكين إنو بيعطوا أمثلة واقعية على أمثلة الشعبية متل «ع الوعد يا كمون» لأنها عوجة- عوجة.. وما فرقت معنا لا ع مستوى ساعات الوصل ولا ع مستوى ساعات القطع..

يقول الخبر: «مدير شؤون الصحية محافظة دمشق، اعتباراً من يوم الأحد 8 أيار بدء الآلية التنفيذية لتسجيل الكلاب الخاصة على أن يتم منح بطاقات تسجيل للكلب الخاص، يذكر فيها اسم المالك ونوع الكلب ولونه ورقمه المسجل وذلك عن طريق طلب يقدم إلى مديرية الشؤون الصحية.«
تعليق: فعلاً شي مضرورين عليه كتييير... السوريين كلن مُنعمين بكل وسائل النعم.. لك تركوا كلشي اسمو فساد ونهب بالبلد ولحقوا مين مربي كلاب مو لشي.. لشفط المصاري منن وبس... هُزلت يا جماعة ح يصير في بطاقات شخصية للكلاب.. وبكرا يمكن تدخل تكامل ع الخط كمان.. واللي عندو كلب ح يصير مسحوب الدعم.. ليش لأ؟!

يقول الخبر: «أوضح رئيس جمعية اللحامين في دمشق، أن سوق اللحوم سيكون مستقراً خلال هذه الفترة، نافياً وجود أية زيادة على الأسعار، هذا وقد حافظت أسعار اللحوم على ارتفاعها منذ بداية شهر رمضان .«
التعليق: يعني شو استفدنا من الحكي إذا الشعب مو قدران يشم ريحة اللحمة من قبل رمضان هاد ويلي قبلو وقبلو بكتير... وين الحل.. وين العواس تبعنا واللي صار مو إلنا... لك وووووين الحكومة؟؟