خبر عام وتعليق هام... «موضوع الكهرباء سيكون أفضل في المستقبل القريب»

تعليق: المستقبل القريب؟؟؟ موضوع الكهرباء؟؟ يعني الكهرباء صارت موضوع وما عادت أزمة عم تنهش بالبلاد والعباد.. وح يبقى حلها ع الوعود وسين التسويف الحكومية المطاطة.. يا ترى بعد هيك منلحق نشهد تحسن ع موضوع الكهرباء نحو الأفضل.. ولا ما ح نلحق؟؟

يقول الخبر: «محروقات حلب تأخر رسالة الغاز لدى عدد من المواطنين سببه عدم اختيار المعتمد ضمن الحي عبر تطبيق «وين»، وبإمكانهم اختيار معتمد الغاز عبر التطبيقات المتاحة خلال يومي الجمعة والسبت، ولا يمكن تقنياً أن تصل الرسالة إلا بعد اختيار المعتمد».
تعليق: شفتو كيف في غاز بالبلد وغامرنا غمر؟؟؟ بس الحق ع العالم مو عرفانين يختاروا المعتمد المناسب... وهنن عم يتأخروا بالرسائل ليعلموا العالم تعرف تتصرف وتتعامل صح مع تطبيقات الذكاء الإلكتروني.. هي كل القصة... ومن هون لتتعلم الناس خليها تستنجد بالسوق السوداء.. اللي ما عم تعاني من نقص بالإمدادات.. أبصر كيف ومنين ولمصلحة مين؟!

يقول الخبر: «لجنة تحديد الأسعار في محافظة دمشق تصدر نشرة لتحديد أسعار الألبان والأجبان، حيث ابتدأت الأسعار من 2200 لـ 13000 للحليب واللبن والجبنة البقرية».
تعليق: لك صرلنا أكتر من شهرين عم نشتريها بهل الأسعار هي تبع النشرة العجيبة... وهلأ رح نشوف زيادة بأسعار السوق.. بما إنو في علاقة طردية بين نشرات الأسعار الرسمية وأسعار الأسواق؟؟!! هاد غير الحكي عن الجودة والمواصفة والغش.. وكلو على عينك يا تموين!!!

يقول الخبر: «أكد مدير التأمين والمعاشات أنه يمكن للمواطنين المتقاعدين بدءاً من يوم الأربعاء استلام المنحة قبل العيد عبر الصرافات أو كوات البريد التابعين لها، مشيراً إلى أن المصارف وعدت بأن يستمر توفر الكتل النقدية ضمنها، حيث يحول المصرف كل ساعة 25 ألف اسم ليتاح لهم القبض».
تعليق: مو لازم بالأول تصلحوا وتشغلوا الصرافات وتخلوهن بالخدمة وتعبون مصاري وتأمنوا كهربا الهم.. حتى المواطن ينعم بهل المنحة.. يلي يا دوبها تكفي مصروف يومين.. أحسن ما يضل عم يتنقل من صراف لصراف حتى يقبضها؟؟

يقول الخبر: «بالتعاون بين المصرف العقاري والشركة السورية للمدفوعات الإلكترونية، أصبح بإمكان المكلفين دفع ضريبة الدخل المقطوع وضريبة البيوع العقارية عن طريق قنوات البنك العقاري (بنك الإنترنت- تطبيق الموبايل)».
تعليق: سبحان الله كل شي في دفع من جيبة المواطن بتتحسن خدماتو وبيشتغل الذكاء الإلكتروني فيه ع أحسن وجه.. أما حقوقو المرتبطة بهالذكاء بتتعسر.. يعني عنجد وقت بدهم يشتغلو بالذكاء لمصلحتهم بيطلع معهم تطور وتقانة من قلب ورب!

يقول الخبر: «أوضح مدير المؤسسة العامة للتجارة الخارجية أنه سيقام مزاد لبيع 64 سيارة مستعملة في ١٧ و١٨ أيار المقبل، وهو جزء من الأعمال الدورية للمؤسسة، مشيراً إلى أن السيارات ضمن المزاد مصادرة أو مملوكة لجهات عامة حيث يتم بيعها لتحقق العائدية المادية.. ولسد الفجوة الموجودة في السوق نتيجة ازدياد الطلب على السيارات».
تعليق: طبعاً متل العادة في سيارات حديثة ح تنباع بمئات الملايين.. يعني المزاد لشريحة معينة من اللي عندهم فائض سيولة.. أبصر منين.. وهدول طبعاً اللي فيهم يتبعزقو بصرف البنزين أصلاً.. بكل الأحوال بكرة بيدوب التلج وببان المرج.. أما ازدياد الطلب ع السيارات فهاد الو حكاية تانية خاصة مع قلة البنزين وارتفاع تكاليف الصيانة والإصلاح.. فعن أي طلب وزيادة فيه عم ينحكى.. غير طلبات هالشريحة اللي ما بيشبعها شي..