الدوّامات ما بتخلص

راس براس

حدثنا أحمد: متلي متل شباب هالأيام عم نعارك بالحياة يا بتغلبنا يا بنغلبها، بلشت شغل بهاد المعمل من أربع سنين وكنت قول الحمد لله على كل حال لأنو البلد ما فيها شغل وأنا عم حافظ عالشغل اللي بين إيديي كرمال ما فوت بدوامة «البحث عن شغل» وأنا دوامة مصاريفي والتزاماتي بتكفيني ،أنا من سكان صحنايا وبعد رفع أسعار المواصلات ماعاد فيني كفي بهدا الشغل لأنو لأوصل لهون بدي سرفيسين بالروحة وسرفيسين بالرجعة يعني بدفع باليوم 18 ألف ليرة لروح عالشغل وارجع عبيتي يعني بالشهر بدي مواصلات بس أكتر من 450 ألف هي لسا ما أكلنا ولا شربنا، وبالمناسبة أنا بدخن للأسف وعندي مصروف باكيت دخان باليوم سعرو مو ثابت حسب الدولار لوين رايح بياخدنا معو يعني تقريبا عندي بالشهر دخان شي 200 ألف وكون شغلي طويل بطلع من بيتي الساعة ٧ الصبح لأحسن أوصل عالمعمل ٨ ونص وبرجع الساعة ٦ المسا وما بوصل عبيتي لل٨ ونص بحتاج لآكل مرة وحدة عالأقل و هالشي بكلفني 10 أو 15 ألف يعني بالشهر أكثر 300 ألف، تخيلي كل هالمصروف بس مشان اشتغل وفعليا راتبي شو بدو يتحمل ليتحمل أو بالأحرى هو طاير قبل ما اقبضو وهالشي خلاني قصر عن التزامي بالبيت كنت أعطي أمي 300 ألف بالشهر بعينوها بس آخر شهرين ما حسنت أعطيها ولا ليرة لأني عم أصرف كل راتبي اللي هو مليون ليرة.

منطق تنزيل الراتب الجديد

انا مرتاح بالمعمل اللي بشتغل فيه قلت خليني أطلب زيادة راتب وانا للصراحة مو حابب أترك بس أكيد بيجيني نفس الرد اللي عم يجي لكل العمال اللي عم تطلب زيادة أنو المعيشة نزلت كيف بدي زيد الراتب أنا لازم نزلو ،هوي المعيشة ك أكل وشرب إي والله نزلت وصار أحسن الحمدالله بس حق الخبز والغاز لحالهم عوضو كل شي وفي شغلات صارت بالدولار وأنا بقبض سوري ومندفع أجار البيت بالسوري ولسا ما نزل ولا ليرة بالعكس جددت العقد الجديد عالسعر القديم ، وضيفي المواصلات اللي طلعت كتير وكل هذا بيقلك نزلت المعيشة والبضاعة رخصت هالعالم اللي قاعدة عم تحكي هيك وخاصة صاحب الشغل وين عايشين بالمريخ؟

شغل جديد ودوامة جديدة

حالي حال كتير شباب وصابرين لأن ما في شغل بس أنا صابر هالكم يوم لأن هذا الواقع ما بخليك بدوامة وحدة وبيفرض عليك دوامة تانية تفوت فيها ويا بتزبط يا ما بتزبط هلأ أنا حاطط خبر عند اكتر من معمل بنفس المنطقة اللي ساكن فيها وهيك أحسن لإلي بكتير بوفر المواصلات وإن شاء الله لاقي بنفس الراتب مع أنو كتير صعب نحنا عنا معامل بصحنايا بس أغلبها واقف أو مخفف شغل ومو طالبين عمال وأنا حضل دور لأني ما فيي أترك الشغل قبل ما لاقي شغل تاني صار الشغل بالمدينة صعب ومكلف والريف رواتبو أضعف ورغم هيك حضل دور يمكن برجع بشارك بمصروف البيت.