خبر عام وتعليق هام... شجاعة رأس المال الخاص تتجاوز شجاعة رأس المال الحكومي...!

تعليق: أكيد مالنا ضد القطاع الخاص وقت بيكون منتج وهمه البلد والناس اللي فيه... بس هاد الحكي شو معناه بالله... يعني ليش حتى يكون رأس المال الخاص أشجع من الحكومي... معقول هيك... لك المتل بيقول اللي بأيدو القلم ما بيكتب حالو من الأشقياء... حكومة أضرب واطرح وبإيدها السياسات والقرارات... وعندها كل ممكنات الدولة... وبعد كل هاد بتعترف بالجبن بمواجهة القطاع الخاص... والله شي عجيب وغريب فعلاً!!

يقول الخبر: المدير العام لهيئة الاستثمار السورية ندى لايقه في تصريح عقب اجتماع المجلس الأعلى للاستثمار: إدراج قطاع النقل الداخلي ضمن المشاريع المستفيدة من قانون الاستثمار!
تعليق: ع هالحالة في مستثمرين ح يدخلوا على خط النقل الداخلي مع إعفاءات كبيرة بحسب قانون الاستثمار... يعني القصة مشان مصلحة بعض المستثمرين باسم حل مشكلة النقل الداخلي... ومع هيك مالنا ضد... بس شو ح يصير بالشركات الخاصة والسرافيس اللي عم تشتغل حالياً... لأن المنافسة مع شركات كبيرة وبإعفاءات كمان مو لمصلحتهم... والأهم لنشوف كيف ح تكون تسعيرة النقل ع المواطن بعدين!

يقول الخبر: وجّه رئيس مجلس الوزراء كتاباً إلى وزارة الموارد المائية طلب فيه العمل على التنسيق مع من يلزم وموافاة رئاسة مجلس الوزراء بمذكرة تتضمن رؤية الوزارة ومقترحاتها لإعادة النظر بآلية عمل الشركة العامة للصرف الصحي على مستوى المحافظات من منظور اقتصادي ربحي بالاستفادة من تجارب الدول الأخرى في هذا المجال، وبما يمكّنها من خلق سبل لتحقيق الإيرادات المطلوبة للنهوض بواقعها وتحسين جودة الخدمات المقدمة من قبلها.
تعليق: التوجيه الحكومي ما كان بس لوزارة الموارد المائية وبس... في كتب شبيهة تم توجيهها لوزارات تانية بنفس المضمون... زيادة الإيرادات والأرباح... يعني بالمختصر المفيد الحكومة بدها اقتراحات جديدة من الوزارات لتزيد الجباية من جيوب الناس ع حساب الخدمات والأسعار و... يعني الباين إنو جايين ع أيام سودة أكتر وأكتر ع إيدين هالحكومة...!!

يقول الخبر: أكد وزير الزراعة، حول تحديد إجراءات ومعايير حصر الأضرار الناجمة عن الحرائق، أهمية تحديد معايير لحصر الأضرار ووضع برنامج لتعويض المزارعين، على أن يكون التعويض من صنف الضرر الحاصل كتوزيع الغراس والدعم من الجمعيات وغير ذلك، مع الحرص على تلافي أي ثغرات أو سلبيات في عمل لجان تقدير الأضرار، والتدقيق في البيانات المقدمة لها والتي يجب أن تكون مبنية على أسس واضحة.
تعليق: حلوة عبارة التعويض من صنف الضرر... وع هالحالة يعني اللي راحت عليه شجرة بالحريق بيتم تعويضه بغرسة... هاد إذا تم تشميله بالمعايير اللي لسا مو واضحة وبدها شغل... وبعد الوقت على عمليات حصر الأضرار وتدقيق بياناتها... يعني العوض بسلامة المتضررين بالتعويض العادل!