خبر عام وتعليق هام... منع المولدات الصغيرة في الشعلان والشخوص للكبيرة!

تعليق: هلأ الحكي عن إلغاء المرائب الطابقية تحت الحدائق إيجابي وانشالله يستمر... بس تعودنا انو وقت بيجي مستثمر محظي بتم غض الطرف عن رأي المجتمع المحلي بكل سهولة... وهاد بينطبق تماماً ع قصة المولدات اللي تقرر منعها هلأ بقرار الأغلبية... وطبعاً كرمال مستثمري مولدات الأمبير بالمنطقة!!

يقول الخبر: محافظة دمشق: إنارة دمشق بالطاقة بالبديلة، يحتاج إلى 600 مليار ليرة ولا يوجد إمكانية لدى المحافظة لتنفيذ ذلك والشوارع التي تمت إنارتها تمت بالتشاركية بين المجتمع الأهلي والمحافظة.
تعليق: يعني بكل راحة ضمير المحافظة بتعلن تخليها عن مهامها... وبتجيّر القصة ع الناس.. وبتعمي ع قلبهم بالمبالغ الكبيرة كمان مشان يبقو من تم ساكت ع حقوقهم... لك في اكتر من هيك ظلم وفجاجة؟!!

يقول الخبر: غرفة تجارة دمشق: ارتفاع أسعار الزيوت النباتية سببه الأوضاع الراهنة!
تعليق: ليش القصة وقفت ع ارتفاع أسعار الزيوت النباتية وبس... لك كل الأسعار ارتفعت بالسوق... من جرزة البقدونس وجر... وقصة الأوضاع الراهنة صارت ذريعة جديدة للنهب والاستغلال... وأصلاً ما عادت راهنة صارت قديمة وبايتة كمان!

يقول الخبر: السورية للاتصالات: تأثر جودة الإنترنت نتيجة حدوث قطع على أحد الكوابل الضوئية داخل سورية.
تعليق: اللي بيقرأ «عبارة تأثر جودة» بيخطر بباله انو القصة صغيرة وحدث عابر بيمر... بس كل الناس بتعرف انو النت منعدم الجودة من زمان... لك من أيام قصة القرش... بتتذكرو... ولوووو شو قديمة هالقصة المستمرة بعناوين مختلفة كل مرة!!

يقول الخبر: احتلت سورية المرتبة الأولى بين الدول العربية في تصنيف الأطعمة على موقع «TasteAtlas» العالمي لعام 2024، إذ تم توثيق العديد من الأطباق السورية على المنصة.
تعليق: هههههه... يعني ما منعرف لازم نفرح ولا نبكي ع هالخبر... هي أول مرة بتحتل سورية المركز الأول... وياريت ع شغلة عليها القيمة... لأن ع بقية الشغلات المهمة ترتيبنا دائماً بالمواقع الأخيرة... يعني القصة بدها زفرة طويلة وما بتخلص لأن الناس جوعانة للأطعمة وقصة التصنيف آخر همها!!

يقول الخبر: قال رئيس جمعية اللحامين بدمشق معتز العيسى إن انخفاض أسعار اللحوم الحية من الأغنام سببه قلة الطلب على اللحوم الحمراء ورخص لحم الفروج.
تعليق: يعني لو كان سعر الفروج أعلى كانت الناس اشترت لحم الغنم... لك من زمان نسيت الناس اللحم الأحمر بسبب سعره... والمصيبة أنو وقت بيرتفع سعر الفروج بتصير محرومة من كل اللحوم... يعني لا بيضة ولا حمرا...!!