خبر عام وتعليق هام... مناقصة نبش النفايات رست على أحد المتعهدين بقيمة 2.8 مليار ليرة!

تعليق: يعني النبش بالنفايات صار مشروع ورسمي بقلب المدينة وبالمكب بريف دمشق... وهالمليارات حصة المحافظة من المناقصة في أضعافها لحساب المتعهد طبعاً... بس يا حرام ح يطلع من عيون وع حساب تعب النباشين وصحتهم... وخاصة الغالبية صغار السن... بالمختصر الخبر منيح بس مو مفرح أبداً...!

يقول الخبر: ناقش مجلس الوزراء مشروع الصك التشريعي الخاص بإحداث الهيئة الناظمة لقطاع الكهرباء والطاقات المتجددة، وذلك بهدف تحقيق مشاركة القطاع الخاص في الاستثمار بمجال توليد وتوزيع الكهرباء لتطوير وتحسين الخدمة وزيادة الوثوقية واستمرارية التغذية والتشجيع على استقطاب رؤوس الأموال والمستثمرين بما يخدم المصلحة العامة.

تعليق: يعني ح يصير في جهة إدارية جديدة تنافس بقية الجهات العامة على مهامها وواجباتها كالعادة... وح تحمل الخزينة العامة مصاريف مستجدة كمان... والله يستر ما تكون مهامها زيادة الخصخصة بقطاع الكهربا... لأن المكتوب مبين من عنوانه...!!

يقول الخبر: تحت عنوان «لأجل دمشق نتحاور» محافظة دمشق تقيم جلسات حوارية تشاركية تهدف للتعرف على آرائكم ومقترحاتكم حول المشاريع والخدمات اللازمة لتنمية أحيائكم وتطويرها. والدعوة موجهة إلى السادة الأهالي الأعزّاء في أحياء دمشق.

تعليق: والله هالحكي حلو وعليه علامات... بس معقول لهلأ ما بتعرف المحافظة شو مطلوب منها وشو رأي الناس ومقترحاتهم... ولا هاد شكل جديد من رفع العتب والتسويف... يعني كتير بسيطة طلبات الناس شو رأيكم مبدئياً تبدو بالكهربا بالشوارع والمواصلات والشوارع المعبدة والنظيفة... وبس تنجزو هي الطلبات بعدين منكمل...!!

يقول الخبر: استجابت وزارة الصحة لمطالب آلاف الممرضين والعاملين في القطاع الصحي بإقرار زيادة في تعويض طبيعة العمل لتصل إلى 50%، والقرار ينتظر الآن موافقة وزارة المالية لتطبيقه رسمياً!

تعليق: لك حتى عبارة «الرمد أحسن من العمى» ما بتنطبق هون... وأخيراً وبعد انتظار سنوات وافقت وزارة الصحة ع التعويض بهالنسبة المتواضعة... وهلأ صار دور موافقة وزارة المالية... والمصيبة إنو يستمر الانتظار سنين إضافية... مع العلم انو المشكلة أبداً مو هون... المشكلة أصلاً بالراتب الهزيل والمنسي...!

يقول الخبر: وزارة الاتصالات والتقانة: يهدف مشروع إحداث منطقة تكنولوجية تخصصية في سورية إلى إنشاء وتطوير منطقة متخصصة بتقانة المعلومات تضم شركات الاتصالات وتكنولوجيا المعلومات المحلية والأجنبية، إضافة إلى تأمين البنى التحتية اللازمة لعملها بالقرب من الهيئة الوطنية لخدمات تقانة المعلومات.

تعليق: يمكن نقول إنها خطوة إيجابية مستقبلية... بس شو مشان البنى التحتية للخدمات المقدمة من شركات الاتصالات حالياً... ولا هي مو بالحساب... لك علب الهواتف الأرضية وتمديداتها فايتة بالحيط... وجزء كبير من أبراج الخليوي خارج الخدمة... وفوقها أسعار الخدمة مرتفعة وعم تزيد... يعني هاد مو أهم للناس...؟!

يقول الخبر: محافظة دمشق تضع ضوابط تركيب المنظومات الشمسية على أسطح الأبنية وبمسؤولية مديرية دوائر الخدمات.

تعليق: الأكيد ضروري يكون في ضوابط وشروط... بس المصيبة انو تصير سبب للمحسوبية والوساطة والفساد... على روح وتعا... وجيب مخطط وخلي الفنيين يدرسوه.. وبالأخير يا بتصير الموافقة أو ما بتصير... مو هيك؟!