خبر عام وتعليق هام.. لن يرفع الدعم عن القطاع الصحي وهو حق مكفول بالدستور!!

تعليق: من ناحية الحقوق المكفولة بالدستور فهي كتيرة.. ورغم هيك صارت بخبر كان ع ايدين الحكومة وسياساتها.. فما وقفت ع حق الصحة اللي انهضم وتقلص لدرجة انو الفوتة ع المشافي العامة فعلاً لسا مجانية.. أما الخدمات فأبداً مو هيك.. التحاليل إذا نوجدت فمو كاملة والأدوية شرحو.. والتجهيزات ناقصة.. والأكتر من هيك النقص بالكادر الطبي.. وما عاد نعرف شو يعني مجانية وحقوق دستورية بعد كل هاد؟!

يقول الخبر: كشف وزير الشؤون الاجتماعية والعمل لؤي المنجد عن وجود دراسة جدوى اقتصادية بين وزارتي الكهرباء والشؤون الاجتماعية لاستثمار فائض أموال التأمينات الاجتماعية في الطاقات المتجددة لتحقيق عائد يضمن عدم إفلاس المؤسّسة، عوضاً عن أن تكون هذه الأموال مجمّدة.
تعليق: الله يجير أصحاب الحقوق بمؤسسة التأمينات، وخاصة المتقاعدين من هيك مشاريع استثمارية.. لأن مع انتشار عوامل النهب والفساد بيصير الخوف من الإفلاس أكبر من الخوف ع الأموال المجمدة...!!

يقول الخبر: معاون مدير إدارة الهجرة والجوازات: رفع سعر الجواز كان لتخفيض الضغط وتنظيم الدور، وعدم التزام بعض المواطنين بالموعد، وعدم استلامهم لجوازات سفرهم أثر على المنصة!
تعليق: يعني منفهم من هالحكي بكل وضوح أنو رفع سعر جواز السفر مشان تطفيش المواطنين من التسجيل ع المنصة.. مو بسبب التكاليف المرتفعة.. بعدين شو فائدة المنصة إذا ما كانت عم تنظم الدور.. وكيف زيادة سعر الجواز بدو يساهم بتنظيم هالدور.. حدا يترجم هالحكي مشان نفهم يا جماعة!!

يقول الخبر: وزير التعليم يوجه بضرورة التقيد بعدم جواز حصول الطالب على شهادتين جامعيتين في الوقت نفسه من المؤسسات التعليمية الحكومية السورية!
تعليق: لك إذا الطالب قادر ومتمكن فليش لأ.. أصلاً التعليمات بتوضح انو الطالب الو حق بمقعد جامعي واحد.. وسلفاً المفاضلات عم تصفي وتغربل المتقدمين للالتحاق بالجامعات.. ويمكن ما في غيرنا من الدول ممكن يوجه بهيك توجيهات.. بس الأكيد أنو هاد اسمو تشجيع ع التعلم!

يقول الخبر: بحضور وزير السياحة محمد رامي مرتيني وعدد من المؤسسات الحكومية السياحية انطلاق الملتقى الأول في سورية للسياحة الشتوية والجبلية في منتجع نسمة جبل!
تعليق: ولوووو.. صار عنا سياحة شتوية وجبلية كمان.. وفوقها انطلق المؤتمر الأول باسمها.. يعني عايشين بنعيم ما بعدو نعيم وما لنا عرفانين.. فعلاً التعويل ع السياحة ممكن يخلصنا من مشاكلنا وأزماتنا الاقتصادية الكبيرة بالبلد.. بس بيبقى أنو نستورد سياح طبعاً.. لأن هيك سياحة مو النا أكيد!!

يقول الخبر: سامر سليمان مدير الدفع الإلكتروني في المصرف العقاري السوري للمنصة الاقتصادية: أهم شروط تقديم الخدمة هو الاستمرار.. وخدمات الدفع الإلكتروني والصرافات غير مستمرة وخاضعة لخدمات الإنترنت والكهرباء السيئة!
تعليق: هاد اول اعتراف رسمي عن تأثير سوء الكهربا والانترنت على خدمات الدفع الالكتروني.. ومن مصدر اختصاصي وبموقع ملامس للمشكلة.. طيب اذا هيك عم يحكو الاختصاصيين.. على شو العجلة بالالزام بالدفع الالكتروني..؟!