خبر عام وتعليق هام.. نفى مدير الخزينة وجود نيّة لإصدار ورقة نقدية من فئة العشرة آلاف ليرة خلال الوقت الحالي!

تعليق: الحكي مطروش عن فئة العشرة آلاف ليرة.. والنفي للموضوع صار عن النية الحالية بس.. يعني ع الأغلب ح نشوف ورقة العشرة آلاف ليرة قريباً على ما يبدو.. أما أنو ما ح ترتفع الأسعار فهاد حكي تبريري مو أكتر.. لأن مدير الخزينة بيعرف تماماً الانعكاسات المالية والاقتصادية لها لإجراء واللي منها طبعاً ارتفاعات الأسعار.. يعني الله يستر!

يقول الخبر: أجرى اجتماع برئاسة المهندس حسين عرنوس رئيس مجلس الوزراء بتاريخ 17/4/2023 مراجعة وتدقيقاً لمشروع خطة العمل الوطنية للتعاطي مع تداعيات الزلزال وآثاره على مختلف القطاعات، بما يضمن تأمين قاعدة بيانات دقيقة تشمل مختلف المعطيات التي تمكّن الجهات المعنية بالعمل الإغاثي من القيام بعملها على أكمل وجه في إعادة تأهيل المناطق المتضررة وإعادة النشاطات الاقتصادية والاجتماعية إليها.
تعليق: يا حبيبي.. لك الزلزال مضى عليه أكتر من شهرين.. ولهلأ الحكومة ما خلصت من تأمين قاعدة البيانات.. فكيف عم تشتغل وع أي أساس وعن أي خطة عمل وطنية عم يصير الحكي الله أعلم.. يعني تداعيات وآثار الزلزال ع الناس معها وقت لتنحل.. ليش العجلة؟!

يقول الخبر: حدد مجلس الوزراء خلال جلسته الأسبوعية بتاريخ 18/4/2023 سعر شراء محصول القمح من الفلاحين للموسم الزراعي 2023 بواقع 2300 ليرة سورية للكيلو غرام الواحد.. وجاء تحديد هذا السعر نتيجة حساب دقيق لتكلفة الإنتاج الحقيقية في ظل الدعم المقدم للقطاع الزراعي من بذار ومحروقات وأسمدة، وبما يضمن هامش ربح للفلاح بنسبة 35 بالمئة لكل كيلو غرام، وذلك بهدف التشجيع على تسليم المحصول واستجرار أكبر كمية ممكنة من الإنتاج.
تعليق: أما شو حساب دقيق للتكلفة.. وشو دعم للقطاع الزراعي.. كأن الحكومة عم تحكي من المريخ.. لأن ع حسابات الفلاح هاد السعر أقل بكتير من الكلفة وخسارة كبيرة بالنسبة إلو.. والأريح إنو يترك المحصول للرعي.. وع هاد المنوال ما ح يبقى عنا قمح بالمواسم القادمة.. وح نصير تحت رحمة حيتان الاستيراد برغيف الخبز تبعنا.. يا هيك التخطيط للجوع يا بلا؟!

يقول الخبر: 38 سيدة تم تعيينهن كعاملات نظافة وجندية إطفاء في محافظة حماة.. رئيس مجلس المدينة: هذا الأمر مقبول في بعض الدول الأخرى!
تعليق: طبعاً هاد واحد من نتائج المسابقة المركزية اللي صرعونا فيها وبأهميتها وبالأتمتة فيها.. ودور وزارة التنمية الإدارية اللي المهم بالنسبة إلها إنو صار ملء اسمي للشواغر اعتماداً على العدالة والمساواة بين المتقدمين (يعني لا واسطة ولا محسوبيات).. واللي بدو يعترض أو يستنكف بعد هيك لأي سبب بتروح من كيسو.. وشو يعني تعيين عاملة إطفاء.. مو مشكلة بتصير بأحسن الدول.. القصة بدها بنية جسدية سليمة تتحمل جهد المهنة.. وتكون متفضية للمناوبات الليلية.. ليش لأ؟!