خبر عام وتعليق هام ... «المصرف الزراعي التعاوني قرر التوقف عن بيع الأسمدة للفلاحين بالأسعار المدعومة»

تعليق: متل ما لكل بيعرف الأرض دهب أصفر.. والفلاحين بسورية بفضل الحكومة كلمالن عم يزنكلو أكتر... لهيك قرروا يرفعوا الدعم عنن ويخلوهن يبطلوا بزخ وبعزئة مصاري... معليش المهم الحكومة ما تخسر ولو بدنا نخسر محاصيلنا وأراضينا الزراعية وأكلنا... أما شو حرص ع الأمن الغذائي؟!

يقول الخبر: «وزارة التجارة تستعين بـآلية المتسوق السري لردع المحلات المخالفة ومصدر وزاري يؤكد تطبيقها مخالف للقانون».
تعليق: دخيلو أنا يلي عاملي فيها المحقق كونان.... بس يا ريت يا قلبي تقلدوه منيح وتوصلوا لنتيجة.. مو نلاقي المحققين كونان عم يسلمو ع أصحاب المحلات ويتضيفو كم قرش أو الذي منو... اوكيتو؟؟؟

يقول الخبر: «أصدرت وزارة التربية المتطلبات الضرورية للعام الدراسي لمراحل التعليم كافة من دفاتر مدرسية وقرطاسية».
تعليق: اطلب العلم ولو في الصين.. شنو بسورية العلم صعب صعب صعععببببب كتير والله يا معلم.. الله الوكيل الأهالي استغربت هالمتطلبات الوزارية اللي بتندرج تحت بند التقشف والتوفير وتخفيف الأعباء عليهم.. بس يا ترى ح تلتزم المدارس فيها.. قال دفتر واحد لمواد العلوم والتاريخ والجغرافيا والكيميا والفيزيا والرياضات و.. لك لو الوزارة بدها توزع القرطاسية ع حسابها كان بيطلع معها أظبط من هيك.. مو من باب التقشف طبعاً.. من باب الفساد الموارب؟! طيب ليش ما تعملها.. مو ع أساس التعليم مجاني!؟

يقول الخبر: «وضعت الشركة العامة للنقل الداخلي يوم الجمعة بتاريخ 26/8/2022، /6/ باصات نقل داخلي لتخديم منطقة الشام الجديدة من تحت جسر الرئيس بدءاً من الساعة السابعة صباحاً وحتى التاسعة مساءً».
تعليق: عجبتني فكرة عم يعملوا الداء والدواء بنفس الوقت... حلو الحكي... فهاد الحل عبارة عن نقطتين بنج... يعني كأنهم بخلانين بإبرة البنج تعطوها كاملة للشعب؟؟؟ لأن الأحلى إنكم تخدموا كل المناطق والأرياف مندون ولا استثناء وبكذا باص... وبحسب الكثافة السكانية وخاصة بالمناطق البعيدة.. أصلاً كلو بمعية باصات المنحة الصينية.. طيب كملوها بمعيتكم!