خبر عام وتعليق هام .. «دمشق في مركزها ضمن ترتيب أسوأ المدن للعيش»

تعليق: هههه وكمان هههه... دمشق أقدم عاصمة وأفقر بلد وأغلى بيوت ومعيشة... لا تخرج قبل أن تقول سبحان الله... بس للأمانة بعد هالتقرير جد لازم الكل يضرب تحية لصمود المواطن السوري يلي بعدو عايش ع أرض الوطن...

يقول الخبر: «أعلنت المؤسسة السورية للتجارة عن تقسيط مستلزمات القرطاسية والألبسة المدرسية والحقائب للعاملين بالدولة بمناسبة قرب بدء العام الدراسي بسقف قدره 500 ألف ليرة سورية دون فوائد ولمدة سنة».
تعليق: حلو هل الحكي... روحوا واتشبرئوا يا العاملين بالدولة هي رح يعطوكن قرض متل «السيتامول الوطني إذا ما فادك ما بيضرك» كرمال تكفو تعليم ولادكن بهل الغلا هاد... طيب السؤال للحكومة: كيف بدهن يسددوه براتبن.. وشو ح يبقى معهم حتى يعيشو؟ طيب وغير العاملين بالدولة شو وضعن بلا صغره؟ ولا ليكونوا هدول كمان كلن مريشين بحساباتكم ومالن خبر!!!

يقول الخبر: «أكد محافظ دمشق أنه لن يسمح بظهور مخالفات بناء جديدة في أية منطقة من المناطق بدمشق حفاظاً على سلامة المواطنين، لأن أغلب المخالفات لا يوجد بها دراسة فنية وإشراف فني».
تعليق: طيب ليش أنت يا مواطن عم تسكن بالمخالفات وأنت راتبك كافيك لتشتري أحلى بيت وبأرقى المناطق؟؟ يعني ما خلصنا من طمعك؟؟ وبعدين لا تتحجج شقق الدولة تبع الإسكان كتييييرة، وفيها رخصة ودراسة فنية وإشراف فني وعم تعطي بيوت متل العالم والخلق كافية ووافية... ولا تقول إنو المخالفات لناس وناس أبداً.. لأن هدوليك الناس التانيين اللي ما بيتخالفو كمان ناس!!!

يقول الخبر: «كشف مدير الأسعار في وزارة التجارة الداخلية وحماية المستهلك عن إطلاق مشروع منصة إلكترونية للأسعار ومنصة للشكاوى، ونظام الفوترة التي سيتم إطلاقه قريباً سيكشف مصدر الخلل، وتتم من خلاله الملاحظة من الضبوط أن هناك من يقوم بحجب السلع ورفع السعر».
تعليق: هي ع مبدأ شوفونا كيف عم نعمل لأجلكم... بالأساس لو حابين تضبطوا أية شي بهل البلد فأنتوا قادرين عليه من دون منصات وتكلفة برمجيات وهل البهرجة يلي عم تعملوها... بس ما بدكن تعملوا شي غير تضلوا عم تسكتو هالمواطن يلي صار حافظكن ع ظهر قلب.. وبالنسبة للمنصات الإلكترونية الحكومية يلي عم تطلقوها للمواطنين وباسمهم فما هي إلا عبارة عن بوابة استهلاك لاستخدام باقات الإنترنت والتحديثات ع شي ترللي بالنتيجة.. قال منصة إلكترونية للشكاوى.. يعني وصلنا حقنا وزود يا حكومة!!