خبر عام وتعليق هام.. «السرقة تعود علينا بالربح»

التعليق: مشكورين ع جهودكن ووقتكن الثمين يلي خصصتوه... بس إذا ما تغير الجذر العميق للمصيبة يلي اسمها السوق السودا ع المحروقات ومافياتها... صدقاً ما رح يتغير شي، وأزمة المواصلات بعدا متفاقمة وخصوصي بأيام العطل... وبالمناسبة واجبكن تخصيص كامل وقتكن الثمين لحل جميع الأزمات... وبدون سفق منيّات للعباد..

يقول الخبر: «على ضوء الكشف عن سرقة 4 سيارات محملة بالذرة الصفراء و10 طن من الجاهز الحلوب، صرح مدير عام مؤسسة الأعلاف أن السرقة تعود على المؤسسة بالربح، وإن بعض الموظفين في المؤسسة يعملون في ظروف قاسية جداً من حيث ساعات العمل الطويلة وعدم توفر باصات مبيت لنقلهم إلى بيوتهم».
التعليق: سرقة تعود علينا بالربح؟؟!! أي شو هل التصريح الواضح بوضوح الشمس... ع أساس الشعب ما بيعرف إنو كل السرقات يلي عم تصير الهدف منها هو الربح!!! وبالنسبة للشق التاني من التصريح، جميع الموظفين بهل المؤسسة وبغيرها عم يشتغلوا بظروف مجحفة وقاسية.. والفضل للنهب والعوائد الربحية طبعاً...

يقول الخبر: «وزير المالية، زيادة الرواتب قريباً، الوزارة تعمل حالياً على التشريعات، ومنها: مشروع إعفاء الحد الأدنى من الرواتب والأجور ورفعها إلى 94 ألف ليرة بدل من 50 ألف ليرة سورية. ما يعتبر زيادة على الرواتب».
التعليق: لا هيك كتير... يعني ليش عم تعودوا المواطن ع البعزقة؟؟ هلق كيف عقلو لهل المسكين بدو يتحمل هل الكم الهائل من الزيادة؟؟ بس الشي المضحك بالموضوع إنو معتبرينها زيادة.. والله يستر من تبعاتها النهبوية!!!

يقول الخبر: «وزارة التجارة الداخلية وحماية المستهلك تحدد 1/3/2022 لبدء دورة جديدة لتوزيع المقنن عبر صالات ومنافذ المؤسسة السورية للتجارة، حيث سيتم في هذه الدورة توحيد رسالة السكر والأرز، أما السكّر وزيت التدخل الإيجابي والمياه على البطاقة دون رسائل».
التعليق: وهنا تكمن روح الفكاهة المفرفشة لدى الحكومة بالمساومة ع الحقوق وتأجيلها وتآكلها، كالعادة رح يتم توزيع دورة جديدة.. طبعاً ليلي ما تم استبعادن من الدعم للأسباب الرهيبة يلي اتخذتها الحكومة، وبالنسبة للزيت والسكر يلي بدون الرسائل- بتوصل للمواطن إنشالله بأحلامو.. وفهمكن كفاية...

يقول الخبر: «بينت المؤسسة العامة للإسكان أنه سيتم إلغاء اكتتاب وتخصيص المتأخرين عن تسديد الأقساط الشهرية للمساكن المكتتب عليها من دون الحاجة لإنذارهم أو إخطارهم».
التعليق: برافووووو.... شايفين الناس عايشة من قلة الموت وما معها مصاري لتاكل أو لتنام ومعدتها فيها أكل.. لتجوا وتلغوا الاكتتاب دون الحاجة للإنذار... والله الواحد ما عاد عرفان شو لازم يحكي ع هيك قرارات وتصريحات غير إنها فوق الموتة عصة قبر! بعدين حبيباتي من باب العدالة شو بيطلع للمكتتبين بذمتكم بعد سنين الانتظار بسبب تقاعسكم.. صعبة عليكم العدالة بهاد الجانب أكيد!

يقول الخبر: «توقع عضو مجلس إدارة الجمعية الحرفية للألبان والأجبان في سورية أن تصدر نشرة الأسعار الثالثة للألبان والأجبان خلال الأسبوع المقبل».
التعليق: لا تتوقع خيو، لأنو الأسعار ارتفعت صرلها أسبوع... وتوقعاتكن بتشبه تماماً التوقعات الحكومية.. عم تجي بعد الارتفاع ع أرض الواقع يلي ما عندن علم فيه ليصير في ارتفاع تاني... وهيك القصة ماشية بالبلد..