خبر عام وتعليق هام

التعليق: والله هل السمعات هي ما منسمعها إلا بسورية... منيح يلي ما حددولنا شو لازم ناكل بيوم الجمعة كمان!!

الخبر يقول: «كشف وزير التربية عن بدء تنفيذ التوجه الجديد في التعليم من خلال إدخال التعلم الوجداني الاجتماعي في مختلف المراحل التعليمية، لأن التعلم الوجداني العاطفي والاجتماعي هو أهم ركيزة من ركائز التعليم».
التعليق: يا ريت الوجدان يطال رواتب المعلمين والتعاطف يكون مع واقع عملهم المتعب والمرهق..

الخبر يقول: «أعلن الرئيس التنفيذي لمجموعة «إم تي إن» أن مشغل الاتصالات الجنوب إفريقي سيخرج من سورية، وذلك لأن العمل في سورية أصبح غير محتمل».
التعليق: مع إنو والله يلي شفناه نحنا كمواطنين من شركات الخليوي إنو العمل كان عال العال وشفط المصاري من جيوبنا ع أبو موزة... فعلاً شي غير محتمل..

الخبر يقول: «كشف نائب رئيس لجنة التصـدير في اتحاد غرف التجارة السورية أنه يتم تصدير مواد غذائية تشمل (كونسروة ومكدوس ومخلل) من سورية إلى دول أوروبا».
التعليق: هاد يلي اسمو قيصر الشماعة... بس يلا معليش حرام المغتربين ينحرموا من خيرات بلدون.. بيكفي انو اللي بالبلد محرومين من خيراتها..

الخبر يقول: «محافظة دمشق تضع مراقبين يختمون البطاقات الشهرية الخاصة بالتزويد بالمحروقات عن كل سفرة يقومون بها، وذلك لضبط عمل وسائل النقل العامة».
التعليق: عملياً بعد هذا القرار شهد المواطن السوري أزمة كارثية غير مسبوقة بوسائل النقل وتفاقمت أكتر بعد ما فتحت المدارس...

الخبر يقول: «أصدر وزير التجارة الداخلية وحماية المستهلك قراراً شكل بموجبه لجنة خاصة لإدارة أسواق الهال في دمشق».
التعليق: كترت الأيادي بتحرق الطبخة.. وطباخنا جعيص!! الحمد لله ما في قرار طلع إلا رافقتو فوراً زيادة بالأسعار..

الخبر يقول: «كشف مدير مكتب دفن الموتى في محافظة دمشق عن وجود دراسة لطي قرار منع التنازل عن القبر أو الاستضافة لغير الأقارب والصادر عن المكتب التنفيذي، على أن يسمح بالتنازل والاستضافة ضمن اشتراطات محددة».
التعليق: يعني يلي آعد عم يدعي ع حالو الله ياخدو ليرتاح منون ما رح يرتاح... لأنو رح يلحقوكم بالموتة كمان...