لقمان ديركي
صفر بالسلوك شو علاقتي أنا؟!
تستحق بلادنا أن تدخل غينيس بسبب تحطيمها للرقم القياسي المسجل باسمنا أساساً في ترديد جملة ( شو علاقتي أنا؟!)... فلا أحد في هذه البلد يحب أن يتحمل مسؤولية أحد، فالأب لا يتحمل مسؤولية ابنه، والصديق لا يتحمل مسؤولية صديقه، والأخت لا تتحمل مسؤولية أختها، والأستاذ لا يتحمل مسؤولية تلميذه، الكل يقول لك ( شو علاقتي أنا)، والحقيقة المرة التي سنكتشفها هي أننا شعب ( ما لو علاقة)، ونحن شعب بلا علاقات حقيقية فيما بيننا، فما معنى الصديق الذي لا يتحمل مسؤولية الصديق، وما معنى الأب الذي لا يتحمل مسؤولية أبنائه، ما المعنى من الكلمات إذا لم تكن تحمل شيئاً ما ومسؤولة عن إيصال فكرة ما، لا يمكن أن تكون هناك علاقات دون مسؤوليات، ولا يمكن أن يكون هناك مجتمع أو بلد دون علاقات، فلماذا سكنت بجانبك طالما أنني لا أريد أن أقول " صباح الخير"، لماذا نعيش عصر حارة كل مين إيدو ألو بامتياز؟!
ومن القامشلي مدينة الحب تأتي أخبار مزعجة للجميع، وتحدث أشياء مؤسفة حقاً برأي الجميع، دون أن يتحمل أحد المسؤولية، والكل يقول لك ( شو علاقتي أنا)، وسينبري كردو غاضباً ويقول ( شو مشان أنو صارت الشرطة عنا بترش عالناس ببساطة)، فيرد عربو ( وشو مشان أنو يطلعوا مسيرة بوقت غلط وبخصوص شي ما بيخص البلد)، فينظر كردو ( وشو مشان أنو هدول أهلهم وشعبهم كمان وبيتعاطفوا معهم)، فيرد عربو ( وشو مشان أنو يتعاطفوا ما حدا مانعهم بس بلاها هالمسيرة هلأ.. أصلاً ما رح تقدم ولا تأخر.. ويكتفوا بالكتابة بالجرايد والتصريحات بالإذاعات والتلفزيونات وبإصدار البيانات)، فينظر كردو متعجباً ( وشو مشان أنو معك حق إذا كانوا عم بيعاملوهم منيح وبيعتبروهم اولاد بلد عن جد وبيسمعوا شو مطالبهم ضمن حدود هالبلد وتحت سقف هالبلد)، ( وشو مشان أنو ما لي علاقة.. أنا متلك تعبان وهفتان.. بقى جاية توجع لنا راسنا أنت كمان بمسيراتك وبديباجات حقوق الإنسان)، ويرد كردو متعجباً ( وشو مشان أنو شو علاقتي بالمسيرات والبيانات والمشاكل والقلقلات)، على شو مشان الهويات والمدارس والثقافة والإعلام والمساواة والإحترام والإنتماء والتفاني والإخلاص وأنو صار في شباب عم بيغنوا بالكردي بالشام وانو عم تمشي الأمور بالخير لقدام وخلونا نروق على بعض ونشتغل مع بعض، وأنو في بالإمكان أكتر مما يكون وكان، ويمضي الإثنان ويعودان ويلتقيان ويتحدثان وفي النهاية يقولان كل بصوته العال العال ( شو علاقتي أنا)، مشان الله إذا أنت وهو ما ألكم علاقة.. مين اللي ألو علاقة؟!!!!.. أنا شخصياً لا حدا يقرب علي .. ما لي علاقة!!!!!!!!
