خبر عام وتعليق هام... السورية للطيران تصدر تعميماً بمنع نشر أي معلومة تخص العمل والعاملين!

تعليق: يا ترى هاد التعميم صادر عن المؤسسة ولا من الشركة اللي استثمرتها واستلمت ادارتها... لك طولو بالكم ع الناس شوي... وين الشفافية والمصداقية تبعكم أصلاً... إذا انتو ما بتنشروا أي أخبار عن مؤسستكم... وفوقها صارت بالاستثمار ع السكيتي... يعني معها حق الناس تحكي... مو هيك!!

يقول الخبر: مصرف التسليف الشعبي: انخفاض سقف القروض ناتج عن نقص السيولة والأموال القابلة للإقراض، والتي سببها تراجع معدل الإيداع في المصرف حيث معظم الودائع هي ودائع لجهات عامة على شكل حسابات جارية، وحالياً لا نية لرفع سقوف قروض التسليف وخاصة الدخل المحدود ما لم يحدث تغير في معدلات السيولة لدى المصرف.
تعليق: هي النتيجة الطبيعية لمعدلات التضخم المتزايدة وللسياسات النقدية والمالية المتبعة... ومن الطبيعي بعد هيك انو تكون معظم الودائع للقطاع العام... لك حتى أصحاب الدخل المحدود مو زعلانين من هيك خبر... لأن أصلاً القرض يا دوب يغطي مصروف شهر مو أكتر...

يقول الخبر: محافظة دمشق: لا صحة لما يتم تداوله حول استثمار حديقتي السبكي والجاحظ كمرائب تحت الحدائق، فالحدائق المطروحة للإنشاء والاستثمار كمرائب طابقية تحت الحدائق هي حديقة الطلائع في البرامكة والصوفانية في باب توما فقط، وستطرحان وفق نظام «BOT» وليس بالتشاركية مع القطاع الخاص، بحيث يكون الاستثمار مشروطاً بأن تبقى أرض الحديقة كحدائق عامة حكماً وفق مظهر جميل ولائق.
تعليق: يعني إجا ليكحلها قام عماها... إن كانت السبكي ولا الصوفانية ولا غيرها... مو كلها حدائق ومتنفسات للناس... لك حلّو عن باقة حقوق البشر بحدائقها ومتنفساتها... ولاقوا حل للازدحام المروري والسيارات بعيد عن هي الحقوق... ولا الاستثمار والأرباح أهم...؟!

يقول الخبر: الصندوق الوطني لدعم المتضررين من الزلزال: تسليم الشقق الجاهزة المكتتب عليها لأصحابها سيتم ابتداءً من يوم السبت القادم. منح تعويض نقدي بواقع 40 مليون ليرة للمتضررين من الشريحة CB في المناطق الريفية خارج مراكز المدن كبديل عن الاكتتاب على المساكن البديلة.
تعليق: بكيييييييير.. لك مين بيتذكر إيمت صار الزلزال... طبعاً المتضررين مو ممكن ينسو... بس الحكومة مبين عليها إنها مو مستعجلة أبداً... لك الحكي لهلأ عن الشقق الجاهزة بعد كل هالفترة... طيب شو مشان البقية... وايمت ح تخلص كمالة الشقق... وإيمت ح تتوزع؟!

يقول الخبر: رئاسة مجلس الوزراء: تقديم مذكرة حول واقع مياه الشرب في مختلف المحافظات وخطوات التنسيق بين وزارة الموارد المائية ووزارة الكهرباء لضمان وصول مياه الشرب إلى جميع المناطق.
تعليق: واووووو... وأخيراً صحيت الحكومة على أهمية التنسيق بين وزارة الكهرباء ووزارة الموارد المائية مشان وصول مياه الشرب للناس... بس القصة لسا بدها مذكرة... يعني اجتماعات ولقاءات ومشاروات... وع هالحالة مالنا إلا نستنا فرج الله..!!

يقول الخبر: مجلس جامعة دمشق: يصدر قراراً ينص على إعلان الكليات سلالم التصحيح للمقررات المؤتمتة بما ينعكس إيجابا على الطلبة.
تعليق: هون بينطبق القول أن تأتي متأخراً... بس ليش ع المواد المؤتمتة فقط... يعني بقية المواد معليش تبقى سلالم تصحيحها مغيبة عن الطلاب؟!!

يقول الخبر: مدير كهرباء دمشق وريفها: الوضع الصعب للكهرباء سيستمر حتى بداية الشهر القادم بسبب انخفاض كميات التوليد ما سيزيد حكماً من فترات التقنين في ريف دمشق.
تعليق: هههههه... لك وين الجديد بهالتصريح... فترات التقنين زادت وعم تزيد وح تبقى تزيد.. وكل مرة بتكون المبررات والذرائع ذاتها... انخفاض كميات التوليد ونقص المشتقات وزيادة الحمولات... مو هيك!!