صفر بالسلوك دوري الفوتبول السوري

يا عيني شو لعيب ومعلم وشوطته متل النار.. وطلعته قوية ونطته عالية.. وراسه تمام.. بس أهلاوي.

يا سلام شو بيشوف حواليه منيح.. وشو بيوزع طابات منيح.. وشو بيرجع منيح، وشو بيقدم منيح .. بس حطيني.

يا ليل شو أنيق.. وشو ساحر.. وشو رهيب لما بيفوت بين عشرة وبيصير بوجه الكول.. بس عرباوي.

يا لالالي شو عنده مهارات .. بيفتِّل وبيسحب بالطابة شي خمسين متر.. وبيبعت قذائف عالكول.. بس كرماوي.

يا لطيف شو كدع.. شو صخرة دفاع.. شو قاتل حاله .. شو فدائي.. شو ركيض.. شو مخلص.. بس جهادي.

يا ستار شو بطل.. وشو سريع.. وشو بيشوف الملعب منيح.. وشو بيحب جمهوره.. بس فتوة.

يا رب الأرباب شو لذيذ ورايق .. شو هداف.. بس ابعت له الطابة وشوف شلون بيجيبها كول.. بس تشريني.

يا الله شو أكابر بلعبه وراقي.. وشو عنده كونترول وعيون.. وشو دقيق..بس وثباوي.

يا كريم شو كريم والطابة اللي بتصل لأجره بتروح لقرنة أحلى عالسريع بس شعلاوي.

يا قدير أقدارك الحلوة شو صاحب طريقة بلعبه وشو أستاذ.. بس جبلاوي.

يا حلاوة شو معاصر وشو موديرن.. وشو بيعطي.. وشو بيجيب نتائج بس طلعاوي.

يا حسافة شو بيهدّي.. وشو بيغب لعب وشو بيفتح باصات عالطويل.. بس يرموكي.

يا حرام شو هجوم خطير وفوتاته بتاخد العقل وبتجيب اكوال.. بس جيشاوي.

يا ليلي يا عيني عليه شو بيتحمل مسؤولية وشو بيحمل مباراة.. بس شرطاوي.

يا ليلي ويا عيني عالدوري السوري.. أحلى دوري بالعالم، أحلى فوتبول.. بس سوري.

سوري إي نعم سوري.. هي مشكلته.. أنو سوري.. مع أنو نحنا سوريين كمان، بس متل ما بنشوف وبنحس وبنتصرف.. بنعتقد أنو مشكلته هي أنو سوري، لو ما كان سوري.. كان أحسن واحد بالعالم، بس سوري، لو ما كان سوري كان بطل العالم، بس سوري، لو ما كان سوري كان أحسن مدافع بالعالم، وأحسن مهاجم بالعالم، وأحسن لاعب خط وسط بالعالم، وأحسن حارس مرمى بالعالم، بس للأسف مو ممكن لأنو سوري، وكل شي لعيونك يا سوريا بيصير، ولعيونك الدم والروح، بس سوري.. سوريا.. ما فيني أقبل أنو يكون في حدا بيعرف وبيفهم وبيعطي وبيتألق ويكون بنفس الوقت سوري، ليش ما يكون أنا، طالما أنا سوري، سوري سوريا، يا أنا بكون أحسن سوري.. يا.. سوري.. آسف.. سوري.. والله بحبك يا سوريا.. عن جد.. بس المشكلة أنو أنت سورية، والمشكلة الأكبر أنو أنا سوري. سوري.